Dünya Turizm Təşkilatının nümayəndəsi ATİ-də olmuşdur
Bakı, 24 aprel (AZƏRTAC). Aprelin 24-də Dünya Turizm Təşkilatının nümayəndəsi - qoşulmuş üzvlər və xidmət üzrə icraçı direktor Zoltan Somogyi Azərbaycan Turizm İnstitutunda (ATİ) olmuşdur.
ATİ-dən AZƏRTAC-a bildirmişlər ki, burada tələbələrlə keçirilən görüşdə bu ali məktəbin rektoru, professor Cəfər Cəfərov Azərbaycan Turizm İnstitutunun Dünya Turizm Təşkilatının qoşulmuş üzvü olduğunu diqqətə çatdırmış, həmçinin təşkilatın İpək Yolu proqramı haqqında məlumat verərək tarixi İpək Yolu üzərində yerləşən ölkəmiz üçün əməkdaşlığın əhəmiyyətindən danışmışdır.
Dünya Turizm Təşkilatı, onun fəaliyyəti və strukturu haqqında məlumat verən qonaq təşkilatın 155 dövləti əhatə etdiyini və 400-dən çox qoşulmuş üzvünün olduğunu söyləmişdir. Bildirmişdir ki, 2030-cu ilədək turistlərin sayının 1.8 milyarda qədər artması gözlənilir və bu proses əsas etibarilə inkişaf etməkdə olan ölkələrdə özünü aydın göstərəcəkdir. Bu baxımdan, ölkəmizin Avropa ilə Asiyanın qovşağında yerləşməsinin Azərbaycan üçün turizm baxımdan əlavə imkanlar yaratdığı da tələbələrin diqqətinə çatdırılmışdır.
Sonda Z.Somogyi tələbələrin suallarını cavablandırmışdır.
Bölmənin digər xəbərləri
