“Ekoloji Park”da ağacəkmə aksiyası keçirilmişdir
Bakı, 26 oktyabr (AZƏRTAC). Azərbaycan Respublikası Dövlət Neft Şirkətinin (ARDNŞ) Ekologiya İdarəsi bir sıra kütləvi, ekoloji-maarifləndirmə tədbirlərini həyata keçirməkdə davam edir.
Şirkətin mətbuat xidmətindən AZƏRTAC-a verilən məlumata görə, oktyabrın 26-da Ekologiya İdarəsinin təşkilatçılığı ilə ARDNŞ-in idarə və müəssisələrində çalışan ekoloqlar Suraxanı rayonunda yerləşən “Atəşgah” tarixi abidəsi və Xəzər rayonu ərazisində yerləşən “Qala” Arxeoloji Etnoqrafik Muzey Kompleksinə ekskursiya etmişlər.
Sonra “Ekoloji Park”da yerləşən “Ekoloqlar bağı”nda ağacəkmə kampaniyası keçirilmişdir. Ağacəkmə kampaniyasında çıxış edən ARDNŞ-in ekologiya üzrə vitse-prezidenti Soltan Əliyev tədbirin ekoloji maarifləndirmə və təbliğat cəhətdən əhəmiyyəti, tikintisi başa çatmaqda olan “Ekoloji park”ın salınmasının məqsədi, burada həyata keçirilməsi nəzərdə tutulan genişmiqyaslı işlər barədə iştirakçılara ətraflı məlumat vermişdir.
Tədbirin sonunda iştirakçılar ARDNŞ-in ekologiya sahəsində həyata keçirdiyi layihələrin əhəmiyyəti, nəzərdə tutulan işlərdə ekoloqların rolu barədə fikir mübadiləsi aparmışlar.
Bölmənin digər xəbərləri
