İQTİSADİYYAT
ƏMƏYİN MÜHAFİZƏSİNƏ HƏSR OLUNMUŞ KONFRANS KEÇİRİLMİŞDİR
Əmək və əhalinin sosial müdafiəsi naziri Əli Nağıyev çıxış edərək, bu ildən etibarən respublikamızda ilk dəfə Ümumdünya Əməyin Mühafizəsi
Gününün keçirilməsi barədə nazirlik tərəfindən təşəbbüsün irəli sürüldüyünü demişdir. Nazir işçilərin əməyinin mühafizəsi və onlara sağlam, təhlükəsiz əmək şəraitinin yaradılmasının Azərbaycan dövlətinin daim diqqət mərkəzində olduğunu qeyd etmişdir. Əli Nağıyev əməyin mühafizəsi sahəsində işçilərin hüquqlarının qorunması və mövcud qanunvericiliyin tətbiqinə nəzarəti gücləndirmək məqsədi ilə ölkəmizdə Dövlət Əmək Müfəttişliyinin yaradıldığını konfrans iştirakçılarının diqqətinə çatdırmışdır. Hazırda respublikanın 18 bölgəsində müfəttişliyin yerli şöbələri fəaliyyət göstərir.
Konfransın əsas məqsədini istehsal mədəniyyətinin yüksəldilməsi, istehsalatda baş verən bədbəxt hadisə və peşə xəstəliklərinin miqyasının azaldılması, əmək şəraitinin yaxşılaşdırılması və əməyin mühafizəsi normalarına əməl edilməsi, iş yerlərində istehsal qəzalarının və ölüm hallarının aradan qaldırılması sahəsində görülmüş işlərin nəticələrinin müzakirəsi təşkil edir. Əməyin mühafizəsi və əməyin təhlükəsizliyi sahəsində tədbirlərin hazırlanmasında bütün səviyyələrdə - dövlət, həmkarlar ittifaqları və işəgötürənlər arasında sosial əməkdaşlıq mühüm əhəmiyyət kəsb edir.
Statistikaya görə istehsalatda əməyin mühafizəsi və texniki təhlükəsizlik norma və qaydalarına düzgün riayət edilməməsi nəticəsində hər il dünyada 270 milyon bədbəxt hadisə, 160 milyon peşə xəstəliyi baş verir. Hesablamalara görə bu səbəbdən 2 milyon işçi həlak olur və dünya iqtisadiyyatının ümumi daxili məhsulunun 4 faizi itirilir. Dövlət Statistika Komitəsinin məlumatlarına əsasən respublikamızda son beş ildə istehsalatda orta hesabla hər il 157 bədbəxt hadisə və 30 ölüm hadisəsi baş vermişdir.
Respublikada əməyin mühafizəsi ilə bağlı məsələlərin birgə və daha səmərəli həlli üçün konfransda Dövlət Əmək Müfəttişliyi ilə Azərbaycan Sahibkarlar (İşəgötürənlər) Təşkilatları Milli Konfederasiyası arasında ikitərəfli əməkdaşlığın yaranması qərara alınmışdır.
Çıxış edən digər natiqlər baş verəcək bədbəxt hadisələrin sayının azaldılması, istehsalatda sağlam iş şəraitinin yaradılması, bununla da ölkə vətəndaşlarının sağlamlığının qorunması istiqamətində tədbirlərin həyata keçirilməsi məqsədi ilə Ümumdünya Əməyin Mühafizəsi Gününün Azərbaycanda qeyd olunmasının böyük əhəmiyyəti olduğunu qeyd etmişlər.