ERMƏNİ FAŞİZMİ XOCALIDA MİSLİ GÖRÜNMƏMİŞ SOYQIRIMI TÖRƏTMİŞDİR
Bakı, 26 fevral (AZƏRTAC). Fevralın 26-da Nəqliyyat Nazirliyində Xocalı soyqırımının ildönümü ilə bağlı keçirilmiş mərasimin əvvəlində faciə qurbanlarının xatirəsi bir dəqiqəlik sükutla yad edilmişdir.
Nəqliyyat nazirinin müavini Musa Pənahov Qarabağın ən qədim insan məskənlərindən olan Xocalı şəhərində baş vermiş soyqırımını 1988-ci ildən başlayan Ermənistan-Azərbaycan, Dağlıq Qarabağ münaqişəsi dövründə ən müdhiş, tarixdə misli görünməmiş vəhşiliklərdən biri kimi xarakterizə etmişdir. Xocalıda 1992-ci ilin qanlı faciəsinə kimi 7 min əhalinin yaşadığını xatırladan M.Pənahov, fevralın 25-dən 26-na keçən gecə erməni silahlı dəstələrinin keçmiş SSRİ-nin 366-cı motoatıcı alayının köməyi ilə Xocalı sakinlərinə qanlı divan tutduğunu vurğulamışdır.
Katibliyin müdiri Namiq Həsənov Xocalının işğalının səbəblərindən danışmış, soyqırımı ilə bağlı statistik rəqəmləri iştirakçıların diqqətinə çatdırmışdır. Erməni quldurlarının vəhşiliyi nəticəsində Xocalı əhalisindən 613 nəfərin öldürüldüyü, 487 nəfərin şikəst edildiyi, 1275 nəfər dinc sakinin - qocaların, uşaqların, qadınların əsir götürülərək ağlasığmaz zülmə, təhqir və həqarətlərinə məruz qaldığı, 150 nəfərin taleyi barədə hələ də heç bir məlumatın olmadığı bir daha xatırladılmışdır.
Nəzərə çarpdırılmışdır ki, Xocalıda öldürülmüş 613 nəfərdən 106 nəfəri qadın, 63 nəfəri uşaq, 70 nəfəri isə qoca olmuşdur. Faciə zamanı 8 ailə bütövlükdə məhv edilmiş, 24 uşaq hər iki valideynini, 130 uşaq isə valideynlərindən birini itirmişdir.
Tədbirdə həmçinin Xocalı soyqırımına ilk dəfə dövlət səviyyəsində ümummilli liderimiz Heydər Əliyev tərəfindən siyasi və hüquqi qiymət verildiyi vurğulanmışdır. Bildirilmişdir ki, Milli Məclisin qərarı ilə 26 fevral “Xocalı soyqırımı və milli matəm günü” elan olunmuş, bu barədə bütün beynəlxalq təşkilatlara məlumat verilmişdir.
Bölmənin digər xəbərləri
