Fransa ölkəyə turist axınına görə dünyada liderlik edir
Bakı, 1 avqust (AZƏRTAC). Fransanın Azərbaycandakı səfirliyindən AZƏRTAC-a Avropanın bu qədim ölkəsinin turizm potensialından bəhs edən material daxil olmuşdur.
AZƏRTAC azərbaycanlı turistlər üçün də olacağını nəzərə alaraq həmin yazını təqdim edir:
- İldə təxminən 82 milyon turist qəbul edən Fransa turizm sahəsində dünyada liderlik edir. Bu müvəffəqiyyət onun təbiətinin rəngarəngliyi və gözəlliyi, kəndlərinin özünəməxsus təkrarolunmazlığı, mədəni irsinin, o cümlədən muzeylərinin, tarixi abidələrinin zənginliyi ilə izah olunur. Fransa ABŞ və İspaniyadan sonra dünyada turizmdən ən çox gəlir götürən üçüncü ölkədir.
Rəsmi statistik məlumatlara görə, ötən il Fransaya 81,4 milyon turist gəlmişdir. Bu göstəriciyə əsasən o, ABŞ-ı (62,7 milyon), Çini (57,6 milyon), İspaniyanı (56,2 milyon) xeyli geridə qoymuşdur.
“Frans Press” agentliyinə müsahibə verən Fransanın turizm naziri demişdir: “Bir qədər səy göstərib, bu göstəriciləri yüksəltmək də olar. Amma deyin görək, hansı sektorda nəticələr turizmdə olduğu kimi ilbəil sürətlə artmışdır. 2010-cu ildə dövriyyəmiz 68,7 milyard, 2011-ci ildə 75,4 milyard, 2012-ci ildə isə 77 milyard avro olmuşdur. Biz çalışmalıyıq ki, ölkəyə turist axınında dünyada birinci yeri qoruyub saxlayaq, rəqabətə davamlı olaq, infrastrukturumuzu təkmilləşdirək, təkliflərimizi və göstərdiyimiz xidmətin səviyyəsini yüksəldək”.
2012-ci ildə illik 6 faiz artımla Paris şəhəri turizm sahəsində mühüm göstəricilərə nail olmuşdur. Fransa paytaxtına gələnlər arasında amerikalılar, britaniyalılar və çinlilər sayca üstünlük təşkil etmişlər. Ən böyük artım isə Yaxın və Orta Şərqdən gələn turistlər arasında müşahidə olunmuşdur. Paytaxtın turizm sektoru mütəxəssislərinin fikrincə, bu müvəffəqiyyət mədəniyyət proqramlarının daha dolğun olması ilə izah olunur. Mağazalar, modalar evi və zəngin mətbəx də Parisin cazibədarlığını artıran əsas amillərdir.
Turist axınının əsas hissəsi Parisə yönəlsə də, Provans və Lacivərd sahilləri, Luara vadisi, Atlantik okeanı sahili və cənub-qərb regionları da 1990-cı ildən bəri turistlərin sevimli yerlərinə çevrilmişdir. Luaranın məşhur qəsrləri, Marsel və Kassi arasındakı kiçik cazibədar körfəzlər, Avropada ən böyük hesab edilən Pilanın qum barxanı, bir sözlə, Fransanın görməli yerlərini saymaqla qurtarmaq olmaz. Onlardan 36-sı, o cümlədən Normandiyadakı Sən-Mişel dağı və körfəzi, Versal parkı və sarayı, Şartr kilsəsi, Karkasonun orta əsrlərə dair qalası UNESCO-nun ümumdünya mədəni irsi siyahısına daxil edilmişdir.
Statistika məlumatlarına əsasən, 2012-ci ildə Paris mehmanxanalarında yerlərdən istifadə rekord səviyyəyə çataraq 68 milyon gecə təşkil etmişdir. Mehmanxanalarda qeyri-Avropa ölkələrindən, əsas etibarilə ABŞ, Yaxın Şərq və Asiyadan gələn turistlərin sayının çoxalması müşahidə olunur. 2012-ci ildə bu artım 9,7 faiz təşkil etmişdir. Onu da qeyd etmək lazımdır ki, müştərilərin artan tələblərini nəzərdə tutan, xidmət səviyyəsinə görə sertifikat alan çoxulduzlu mehmanxanalara tələbat get-gedə artır.
Fransanın turizm sektorunda 2 milyon adam çalışır. Onun dövriyyəsi 44 milyard avro təşkil edir ki, bu da ümumi daxili məhsulun 7 faizi deməkdir. Çoxulduzlu mehmanxanalara tələbat daha yüksəkdir. Hollandiyalılar isə kempinqlərdə qalmağa üstünlük verirlər.
Sonuncu statistika məlumatlarına əsasən, avropalı turistləri, daha doğrusu almanları, italyanları, belçikalıları Fransanın təbiətinin təkrarolunmaz gözəllikləri, mədəni irsi, kəndlərinin özünəməxsus xüsusiyyətləri, fransız regionları mətbəxində ən çox məşhur olan breton blinləri özünə daha çox cəlb edir. Əcnəbi turistlər arasında Tuluz ən məşhur fransız şəhəridir. Bu, ilk növbədə şəhərdə işgüzar turizm üçün müvafiq infrastrukturun olması ilə izah olunur. Şəhərdə təyyarəqayırma sənayesinə məxsus çoxlu sənaye müəssisələri vardır və iri şirkətlər il boyu konqreslər və seminarlar təşkil edir.
Pariz və Nitsa rus turistlərinin ən sevimli şəhərləridir, ruslar Fransanı turist marşrutları içərisində məcburi istiqamət hesab edir, onu romantikadan, ətriyyatdan və şərablardan ayrı təsəvvür etmir, və deyirlər ki, hər bir insan ömründə heç olmazsa bir dəfə Fransada olmalıdır. Tarixi və mədəni baxımdan digər Avropa ölkələri ilə müqayisədə Fransa rusiyalıları daha çox cəlb edir. “Atout France” (Fransada Turizmin İnkişafı) agentliyinin statistik məlumatlarına görə 2014-cü ildə Rusiya və Ukraynadan Fransaya gələn turistlərin sayı 1,3 milyon nəfər olacaqdır ki, bu da 2011-ci ildəkindən iki dəfə çoxdur.
Bölmənin digər xəbərləri
