“HƏQİQƏT ANLARI” KİTABININ TƏQDİMAT MƏRASİMİ
Aprelin 30-da Azərbaycan Respublikasının Prezidenti yanında Dövlət İdarəçilik Akademiyasında “Həqiqət anları” kitabının təqdimat mərasimi keçirilmişdir. Prezident Heydər Əliyevin rəhbərliyi ilə gənc müstəqil Azərbaycan Respublikasının xarici siyasət strategiyasının yaranmasını və təşəkkül tapmasını, müstəqil dövlət quruculuğu sahəsində daxili və xarici siyasətin əsas istiqamətlərini əks etdirən bu əsər “Nağıllar evi” nəşriyyatında rus dilində çap olunmuşdur.
Kitabın müəllifi tanınmış jurnalist-publisist Elmira Axundova, redaktoru Mirzə Hüseynzadə, ön sözün müəllifi Milli Məclisin deputatı, xalq şairi Vaqif Səmədoğludur. Kitabda AZƏRTAC-ın foto müxbirləri Oqtay Aydınoğlunun, Yaşar Xəlilovun, habelə Rafiq Bağırovun çəkdiyi şəkillərdən istifadə olunmuşdur.
Akademiyanın rektoru, professor Seyfəddin Qəndilov mərasimi açaraq, çox nəfis şəkildə çap edilmiş “Həqiqət anları” kitabını əhatə dairəsinə görə zəngin bir salnamə kimi qiymətləndirdi. O, jurnalistikamızın görkəmli nümayəndələrindən olan müəllifin yaradıcılığından danışaraq vurğuladı ki, Elmira Axundova son on ildə Prezident Heydər Əliyevin xarici ölkələrə tarixi səfərlərində iştirak etmiş, dövlətimizin başçısının tanınmış siyasətçilərlə keçirdiyi görüşlərin, apardığı danışıqların şahidi olmuşdur. Eyni zamanda, ölkəmizdə və dünyada baş verən siyasi hadisələri daim izləyən müəllif bir çox mötəbər sammitlərin, beynəlxalq forumların işini də dolğunluğu ilə işıqlandırmış və bütün bunlar kitabda öz əksini tapmışdır.
Mərasimdə Prezidentin İcra Aparatının xarici əlaqələr şöbəsinin müdiri Novruz Məmmədov, xarici işlər naziri Vilayət Quliyev, Milli Məclisin sosial siyasət komissiyasının sədri Hadı Rəcəbli, ön sözün müəllifi Vaqif Səmədoğlu, təhsil naziri Misir Mərdanov, Slavyan Universitetinin rektoru, professor Kamal Abdulla, Dövlət İdarəçilik Akademiyasının müəllimləri Vəli Həbibli, Cavanşir Vəkilov, Lətifə Məmmədova, jurnalistlər Qulu Məhərrəmli, Aynur Bəşirli, “Günay” qəzetinin baş redaktorunun müavini Qalina Mikeladze çıxış edərək, kitab haqqında öz ürək sözlərini söylədilər.
Bildirildi ki, müəllifin bu kitabında verilmiş və jurnalist müşahidələrinin nəticəsi olan onlarca maraqlı məqalə, analitik şərhlər Azərbaycanın və Rusiyanın dövrü mətbuatında da dərc olunmuşdur. Gənc müstəqil Azərbaycan respublikasının xarici siyasət strategiyasının yaranması kimi mühüm mövzuya həsr olunmuş kitab hər bir oxucuda ölkəmiz, Prezidentimizin fəaliyyəti haqqında dolğun təsəvvür yaradır. Onu oxuyarkən Prezident Heydər Əliyevin beynəlxalq aləmdəki nüfuzuna, xalqımızın sabahı, dövlətçiliyimizin möhkəmləndirilməsi naminə gərgin fəaliyyətinə və bunun uğurlu nəticələrinə heyran qalmamaq mümkün deyildir. Bütün bunlar kitabda göstərildiyi kimi, Azərbaycan Prezidentinin dərin bilik və zəkası, möhkəm iradəsi,müdrik siyasi uzaqgörənliyi və tükənməz enerjisi nəticəsində başa gəlmişdir.
Natiqlər xüsusi vurğuladılar ki, Azərbaycan tarixinin ən ağır sınaq dövrlərindən, eyni zamanda, xalqımızın dahi oğlu Heydər Əliyevin siyasi fəaliyyətinin ən çətin və yaddaqalan illərindən bəhs edən bu kitabda toplanmış materiallar həm də dövlətimizin başçısının müəllifi özü olduğu yeni neft strategiyasının həyata keçirilməsindəki müstəsna rolunu, ölkəmizin üzləşdiyi çətinliklərin aradan qaldırılması üçün gördüyü nəhəng işləri yenidən göz önündə canlandırır.
Çıxış edənlər bir daha nəzərə çarpdırdılar ki, Prezident Heydər Əliyevin siyasi fəaliyyətinin hər bir dövrü ayrıca tədqiqat, geniş araşdırma və təhlil mövzusudur. Bu baxımdan təqdimatı keçirilən kitab ali məktəb tələbələri, habelə diplomatlar üçün də faydalıdır. Kitabın Azərbaycan dilində nəşr edilməsi zəruridir.
Təqdimat mərasiminin xalqımız üçün böyük bir bayram, dünya miqyaslı siyasətçi və dövlət xadimi Prezident Heydər Əliyevin anadan olmasının 80 illiyi ərəfəsinə təsadüf etdiyini xatırladan natiqlər dövlətimizin başçısını ürəkdən təbrik etdilər, ona uzun ömür, möhkəm cansağlığı, Azərbaycanımızın sabahı naminə yeni-yeni uğurlar dilədilər.
Elmira Axundova təqdimat mərasimi iştirakçılarına, çıxış edənlərə təşəkkürünü, Azərbaycan Prezidenti Heydər Əliyevə və əsərin meydana gəlməsində əməyi olanlara dərin minnətdarlığını bildirdi. O, gələcəkdə də bu işi davam etdirəcəyini vurğulayaraq dedi ki, Heydər Əliyev kimi zəngin dövlətçilik təcrübəsi olan şəxsiyyətin Azərbaycan xalqı qarşısındakı tarixi xidmətlərindən bəhs edən kitablar yazmaq vətəndaşlıq borcu, eyni zamanda şərəfli bir işdir.
Foto Oqtay Aydınoğlunun və
Yaşar Xəlilovundur
Bölmənin digər xəbərləri
