İssıkkul və “Ruh-Ordo”: təbiətin cazibəsi və ruh birliyi
Çolpon-Ata, 25 iyul, AZƏRTAC
İssıkkul möhtəşəm dağ silsilələri ilə əhatə olunmuş və ucu-bucağı olmayan mavi göldür. Onun əsrarəngiz mənzərəsi insanı heyran edir. Gölün güzgü kimi şəffaf səthi o qədər valehedicidir ki, onun sakitliyində saatlarla vaxt keçirə, çoxdan arzuladığınız hüzuru tapa bilərsiniz.
AZƏRTAC xəbər verir ki, Azərbaycan jurnalistləri Qırğızıstana mediatur çərçivəsində ölkənin bu qiymətli incisini ziyarət ediblər. Hərarətli münasibət və qonaqpərvərliklə əhatə olunmuş qonaqlar valehedici mənzərələrdən zövq almaqla yanaşı, həm də bu heyrətamiz bölgə haqqında unikal faktları öyrənə biliblər.
Göl dəniz səviyyəsindən 1608 metr yüksəklikdə yerləşir və haqlı olaraq planetin ən dərin su hövzələrindən biri hesab olunur. Onun ətrafındakı təbii mühit müxtəlifliyi ilə diqqəti cəlb edir. İssıkkul Şimali Tyan-Şanın iki möhtəşəm silsiləsi arasında yerləşir. Gölün şimal sahili hamar şəkildə Kunqey-Ala-Too dağlarının ətəklərinə uzanır, cənub sahili isə Terskey-Ala-Too dağları ilə birləşir. Suları bol olduğundan, təxminən 80 nisbətən kiçik qolu var və bu da özünəməxsus, təəccüblü dərəcədə mülayim mikroiqlim yaradır.
İssıkkul dünyanın hər yerindən olan rəssamlar, yazıçılar və təbiətsevərlər üçün tükənməz ilham mənbəyi olaraq qalır. Çimərlik tətilindən zövq almaq və onun təmiz sularının sehrini yaşamaq istəyənlərin ziyarəti üçün ən yaxşı vaxt iyunun ortalarından avqustun sonuna qədərdir.
Daha sonra Azərbaycan mediasının nümayəndələri “Ruh-Ordo” Mədəniyyət Mərkəzini gəziblər. Bu mərkəz İssıkkul gölünün mənzərəli sahilində yerləşən, 4,5 hektar ərazini əhatə edən unikal açıq hava muzeyi kompleksidir. 2002-ci ildə tanınmış ictimai xadim və xeyriyyəçi Taşkul Kereksizov tərəfindən qurulan kompleks Qırğızıstanda ən çox ziyarət edilən mədəni məkanlardan biridir.
“Ruh-Ordo”nun əsas xüsusiyyəti dünya dinlərinin rəmzi olan beş məbədidir. Bütün məbədlər oxşar görünüşə malikdir və mənəvi bərabərlik, qarşılıqlı hörmət və inancından asılı olmayaraq, insanların birliyi ideyasını əks etdirir.
Kompleksin ərazisində Çingiz Aytmatovun Ev Muzeyi, Qırğız İncəsənət və Mədəniyyət Zalı, incəsənət və foto qalereyaları, böyük manasçı Sayakbay Karalayevin çadırı, “Bilik xəzinəsi”, etnoqrafik eksponatlar, görkəmli şəxsiyyətlərin abidələri, heykəltaraşlıq xiyabanları və çoxsaylı unikal sənət əsəri daxil olmaqla 10 mini-muzey və sərgi məkanı yerləşir.
Təbii akustikaya malik açıq hava konsert zalı, məşhur körpü, İssıkkula baxan mənzərəli səhnə, həmçinin Çingiz Aytmatovun əsərlərinin personajlarına, qırğız xalqının tarixinə və mədəniyyətinə həsr olunmuş çoxsaylı abidə kompleksdə xüsusi ab-hava yaradır.
Bölmənin digər xəbərləri
