İSVEÇDƏ XOCALI SOYQIRIMININ 18-Cİ İLDÖNÜMÜ İLƏ ƏLAQƏDAR BÖYÜK AKSİYA KEÇİRİLMİŞDİR
Bakı, 26 fevral (AZƏRTAC). On səkkiz il əvvəl qarlı-şaxtalı fevral gecəsində ermənilərin Xocalıda törətdikləri dəhşətli soyqırımın ildönümü dünyanın hər yerində olduğu kimi İsveçdə də qeyd edilmiş, faciə qurbanlarının xatirəsi ehtiramla anılmışdır.
Fevralın 26-da İsveç-Azərbaycan Federasiyasının (İAF) təşkilatçılığı ilə Xocalı soyqırımının 18-ci ildönümünə həsr olunmuş böyük aksiya keçirilmişdir.
İAF-ın rəhbərlərindən biri Nasir Məhəmmədi Diasporla İş üzrə Dövlət Komitəsinə bildirmişdir ki, aksiya İsveçin bütün ərazisini əhatə etmişdir. Federasiya ermənilərin Xocalıda və Azərbaycanın digər bölgələrində törətdikləri vəhşiliklərdən, etnik təmizləmə siyasətindən bəhs edən on minlərlə bröşür hazırlayaraq, İsveçdə fəaliyyət göstərən Azərbaycan dərnək və cəmiyyətləri vasitəsilə ölkənin bütün ərazisində paylamış, xarici ölkələrin səfirliklərinə, diplomatik korpuslara təqdim etmişdir.
Aksiyada təkcə Azərbaycan və türk diaspor təşkilatlarının üzvləri, azərbaycanlı tələbələr deyil, yerli ictimaiyyət nümayəndələri də iştirak etmişlər.
Aksiya axşam saatlarına qədər davam etmişdir.
Bölmənin digər xəbərləri
