SİYASƏT
Kiyevdə həmvətənlərimizin başçılıq etdiyi Qafqaz Xalq Rəqsləri Məktəbinin yaranmasından iki il ötür
Kiyev, 12 fevral (AZƏRTAC). Fevralın 11-də Kiyevdəki “Turist” mehmanxanasının “Teatr” salonunda “Qafqaz ritmləri” bayram konserti olmuşdur. Konsert Ukrayna paytaxtında 1 nömrəli Qafqaz Xalq Rəqsləri Məktəbinin (QXRM) yaranmasının ikinci ildönümünə həsr edilmişdir. Bu populyar xoreoqrafiya məktəbinə gənc və istedadlı həmvətənlərimiz Şəmsi Məhərrəmov və Nicat Mirzəyev başçılıq edirlər. Onlar 4 yaşlı körpələrdən tutmuş yaşlı insanlaradək Azərbaycan rəqslərini, habelə Qafqaz xalqlarının rəqslərinin bütün növlərini öyrənmək arzusunda olan hər bir kəsi peşəkarcasına öyrədirlər. Qeyd edək ki, ukraynalılar Azərbaycan və bütövlükdə Qafqaz mədəniyyətinə heyrandırlar. Hazırda məktəbin şagirdlərinin 80 faizinin ukraynalılar olması bu faktı təsdiq edir.
Bayram gecəsi QXRM, “Mirmolodezhi” Beynəlxalq Gənclər Portalı (İntellektual inkişaf ərazisi) tərəfindən “Azərbaycançılıq İnstitutu” Beynəlxalq İctimai Təşkilatının prezidenti, Ukrayna Azərbaycanlıları Konqresinin Kiyev şəhər təşkilatının sədri, Azərbaycanın və keçmiş İttifaqın sərbəst güləş üzrə Əməkdar İdman Ustası və Əməkdar Məşqçisi Oleq Krapivinin sponsor dəstəyi ilə təşkil edilmişdir.
Konsertin əvvəlində Ş.Məhərrəmov və N.Mirzəyev təbrik sözü ilə tamaşaçılara müraciət etmişlər.
Şəmsi Məhərrəmov məktəbə göstərilən daimi qayğıya, rəqqasların müxtəlif tədbirlərə dəvət olunmasına görə Oleq Krapivinə səmimi minnətdarlığını bildirərək vurğulamışdır ki, O. Krapivin tərəfindən Kiyevdə Azərbaycan xalqının ümummilli lideri Heydər Əliyevin xatirəsinə həsr olunmuş sərbəst güləş üzrə ənənəvi beynəlxalq turnir Azərbaycanın Ukraynadakı səfirliyinin dəstəyi ilə yüksək səviyyədə keçirilir, QXRM-in yetirmələri yarışların əvvəlində konsert proqramı ilə çıxış etmək şərəfinə layiq görülürlər.
O.Krapivin, Ukrayna Milli Aviasiya Universitetinin professoru Arif Quliyev, Qafqaz məsələləri üzrə ekspert Əli Əliyev və başqaları məktəbin rəhbərliyinə xeyir-dua vermişlər.
Azərbaycan və Ukrayna müğənniləri, rəqqasları və şoumenlərinin, o cümlədən “Eurovision-2011” mahnı müsabiqəsinin qalibi Eldar Qasımovun, 2004-cü ildə həmin müsabiqədə Ukraynaya qələbə qazandırmış Ruslananın, Qaytana və başqalarının Şəmsi Məhərrəmov və Nicat Mirzəyevə videomüraciətləri olmuşdur.
Rəsmi hissə başa çatandan sonra bayram konserti başlanmışdır. Proqrama Azərbaycanın “Yallı”, “Nəlbəki”, “Şalaxo” rəqsləri, habelə Ukrayna, acar, gürcü, Dağıstan, qaraçı, çeçen rəqsləri daxil edilmişdir.
Tamaşaçılar rəngarəng şounun təşkilatçılarını və iştirakçılarını sürəkli alqışlarla mükafatlandırmışlar.
Konsert başa çatandan sonra O.Kapivin ən yaxşı rəqqaslara müxtəlif dövlət və ictimai təşkilatların fəxri fərmanlarını və mükafatlarını təqdim etmişdir.
Zeynal Ağazadə
AZƏRTAC–ın xüsusi müxbiri
Kiyev