LONDONDA “ODLAR YURDU” QƏZETİ ÇAPDAN ÇIXMIŞDIR
AZƏRTAC xəbər verir ki, Böyük Britaniyada fəaliyyət göstərən “Odlar Yurdu” təşkilatının təsis etdiyi “Odlar Yurdu” qəzetinin təqdimatı olmuşdur.
Diaspor ilə İş üzrə Dövlət Komitəsindən bildirmişlər ki, 70-dən çox qonağın iştirak etdiyi tədbirdə “Odlar Yurdu” təşkilatının sədri İlham Nağıyev çıxış etmiş, qurumun fəaliyyətindən, həyata keçirdiyi layihələrdən danışmışdır. “Odlar Yurdu” qəzetinin təsis olunmasını təşkilatın daha bir nailiyyəti adlandıran İ.Nağıyev demişdir ki, əsas məqsədlərdən biri bu qəzeti ən qısa zamanda Avropa ölkələrindəki Azərbaycan icmalarının stolüstü qəzetinə çevirməkdir. O, qəzetin nəşrinə göstərdiyi köməyə görə, Azərbaycanın Böyük Britaniyadakı səfirliyinə minnətdarlığını bildirmişdir.
Azərbaycanın Böyük Britaniyadakı səfiri Fəxrəddin Qurbanov isə “Odlar Yurdu” təşkilatını yeni layihəyə başlamaları münasibətilə təbrik etmiş, uğurlar arzulamışdır. Səfir Böyük Britaniyadakı Azərbaycan diasporunun fəaliyyətini yüksək qiymətləndirmişdir.
Sonda Londonda fəaliyyət göstərən “Caspian-Khazri” məktəbinin yeni yaradılmış rəqs qrupu Azərbaycanın milli rəqslərini ifa etmişdir.
######
Bölmənin digər xəbərləri
