Masallıda yay turizm mövsümü başlanmışdır
Masallı, 11 iyun (AZƏRTAC). Masallı rayonunun turizm obyektlərində və istirahət mərkəzlərində yay turizm mövsümü başlanmışdır.
AZƏRTAC xəbər verir ki, rayonda mövcud olan 31 turizm obyektində gün ərzində 1300-ə yaxın turistin istirahəti üçün hər bir şərait yaradılmışdır.
Ötən il Masallı rayonuna 17 mindən çox turist gəlmişdir. Onların 700 nəfəri xarici ölkələrin vətəndaşları olmuşdur.
Rayonun turizm obyektlərində və istirahət mərkəzlərində turistlərə üç istiqamət üzrə xidmətlər təklif olunur. Buraya rayonun təbiəti, gəzməli-görməli yerləri, zəngin flora və faunası, tarixi abidələri daxildir.
Masallının istirahət mərkəzləri arasında “İstisu”nun özünəməxsus yeri vardır. Buraya gələnlər dincəlməklə yanaşı, müxtəlif xəstəliklərlə bağlı müalicə də alırlar.
Rayonun “Palma” və “Cənnət bağı” istirahət mərkəzlərində də turistlərin dincəlməsi üçün lazımı şərait yaradılmışdır.
Masallı rayonunda turizmim inkişafı üçün geniş imkanlar vardır. Hər cür infrastruktura, gözəl təbiətə, ləziz mətbəxə malik olan turizm obyektlərində və istirahət mərkəzlərində dincələn turistlər onlara göstərilən xidmətdən razılıq edirlər.
Bölmənin digər xəbərləri
