MİLLİ MƏCLİS “BƏLƏDİYYƏLƏRƏ ƏLAVƏ SƏLAHİYYƏTLƏRİN VERİLMƏSİ HAQQINDA” QANUN LAYİHƏSİNİ BİRİNCİ OXUNUŞDA QƏBUL ETMİŞDİR
AZƏRTAC xəbər verir ki, Milli Məclisin aprelin 13-də keçirilmiş növbəti iclasında “Bələdiyyələrə əlavə səlahiyyətlərin verilməsi haqqında” qanun layihəsi birinci oxunuşda müzakirə olunmuşdur. Layihə barədə məlumat verən Milli Məclisin regional məsələlər daimi komissiyasının sədri Arif Rəhimzadə bildirmişdir ki, qanun müvafiq icra hakimiyyəti orqanları tərəfindən bələdiyyələrə yerli əhəmiyyətli məsələlərin həlli üçün əlavə səlahiyyətlərin verilməsi və onların həyata keçirilməsi qaydalarını müəyyən edəcəkdir. Deputatlar qanun layihəsinin əhəmiyyətindən danışmış, bələdiyyələrin işinin səmərəliliyinin artırılması üçün onlara verilə bilən və verilə bilməyən səlahiyyətlər, bu səlahiyyətlərin verilmə qaydaları, maliyyə təminatı, həmçinin səlahiyyətlərin həyata keçirilməsinin tənzimlənməsi və ona nəzarətlə bağlı təkliflər irəli sürmüşlər. Bildirilmişdir ki, bu qanun ölkədə yerli idarəetmənin, bələdiyyələrin fəaliyyətinin təkmilləşdirilməsində, eləcə də tənzimlənməsində mühüm rol oynayacaqdır. Müzakirələrin sonunda qanun layihəsi səsə qoyularaq birinci oxunuşda qəbul edilmişdir.
Axşam iclasında gündəlikdəki növbəti məsələ - “Penitensiar müəssisələrdə cəza çəkməkdən azad edilmiş şəxslərin sosial adaptasiyası haqqında” qanun layihəsi müzakirə olunmuşdur. Sosial siyasət daimi komissiyasının üzvü Elmira Axundova layihəni təqdim edərək bildirmişdir ki, sənədin hazırlanmasından məqsəd keçmiş məhbusların cəmiyyətdən təcrid olunmasının qarşısını almaq, onların tam hüquqlu vətəndaş kimi cəmiyyətdə öz yerini tutmasına, sosial adaptasiyasına kömək etməkdir.
Qeyd olunmuşdur ki, yeni qanun ölkədə sosial adaptasiya mərkəzlərinin yaradılmasını, keçmiş məhbuslara tibbi, psixoloji, hüquqi, informasiya yardımının göstərilməsini nəzərdə tutur. Bu sənəd penitensiar müəssisələrdə cəza çəkməkdən azad edilmiş şəxslərin hüquq və azadlıqlarının, qanuni mənafelərinin qorunmasına xidmət edəcək, həmin şəxslər tərəfindən törədilə biləcək yeni cinayətlərin və onlara təsir göstərə biləcək kriminogen amillərin qarşısını almağa yardımçı olacaqdır.
Deputatlar qanunun penitensiar müəssisələrdə cəza çəkməkdən azad edilmiş şəxslərin cəmiyyətə inteqrasiyası, lazımi sənədlərlə təmin edilməsinə yardım göstərilməsini, onların mənzil-məişət şəraitinin yaxşılaşdırılmasını, təhsilinin və peşə hazırlığının təşkilinin tənzimlənməsində mühüm rolundan da danışmışlar. Azərbaycanda cəmiyyətin demokratik inkişaf səviyyəsinin göstəricisi hesab olunan qanun layihəsi 1-ci oxunuşda qəbul edilmişdir.
Milli Məclisin İqtisadi siyasət daimi komissiyasının sədri Ziyad Səmədzadə “Dövlət borcu haqqında” qanun layihəsini 2-ci oxunuşda müzakirəyə təqdim etmişdir. Bildirilmişdir ki, sənəd dövlət borcalmalarının həyata keçirilməsində, dövlət zəmanətinin verilməsində, borcun idarə olunmasında iştirak edən subyektlər arasındakı münasibətləri tənzimləyəcəkdir.
Müzakirələrdə qeyd edilmişdir ki, qanunda dövlət zəmanəti ilə alınan borcların təminat hesabı, xarici və daxili dövlət borcalmaları, dövlət zəmanətinə xitam, borcların reyestri, dövlət öhdəliyi yaratmayan xarici borcalmalar və s. məsələlər əksini tapmışdır.
Sonda “Dövlət borcu haqqında” qanun layihəsi 2-ci oxunuşda bütövlükdə qəbul edilmişdir.
Bölmənin digər xəbərləri
