Hörmətli deputatlar!

Xanımlar və cənablar!

Azərbaycan xalqının qədim və ulu tarixinin Heydər Əliyev dövrü vətənini və millətini təhlükələrdən qurtararaq, ardıcıl inkişaf yoluna çıxaran nəhəng şəxsiyyətin zamanın fövqünə yüksəlməsinə parlaq bir nümunədir. Ümummilli liderimiz, müstəqil dövlətimizin memarı və qurucusu Heydər Əliyev öz həyatı və fəaliyyəti ilə belə bir həqiqəti bir daha təsdiq etdi ki, tarix boyu Şərqin bir çox qüdrətli dövlətləri xalqımızın yaradıcılıq enerjisindən və zəkasından güc alaraq inkişaf etmişdir. Bəli, məhz xalqımızın birgə zəkasını, iradəsini və əzmini təcəssüm etdirən, böyük siyasi və dövlət xadimlərimizin, tarixi şəxsiyyətlərimizin dövlətçilik ənənələrini iyirminci yüzillikdə davam etdirərək daha da zənginləşdirən Heydər Əliyev uzaqgörənliyi və müdrikliyi, hünəri və cəsarəti, mərdliyi və fədakarlığı sayəsində müstəqil Azərbaycan dövlətini yaratdı, qoruyub saxladı, öz dühasının ən böyük əsəri olan bu dövləti indiki və gələcək nəsillərə ərməğan etdi.

Heydər Əliyevin əsərlərindən biri olan Milli Məclisin binasında onun abidəsinin açılışı günündə biz ümummilli liderimizin Vətən və millət qarşısında misilsiz tarixi xidmətlərini minnətdarlıq hissi ilə dönə-dönə xatırlayırıq. Bütün ömrünü Azərbaycan dövlətinin qorunmasına, möhkəmlənməsinə və inkişafına həsr etmiş, tariximizin ən böyük simalarının ön cərgəsində dayanmaq haqqı qazanmış Heydər Əliyev XX əsrin sonlarında və XXI əsrin əvvəllərində ölkəmizin bütün sahələrdə əldə etdiyi nailiyyətlərin ilhamvericisi və təşkilatçısı olmuşdur. Heydər Əliyevin dahiyanə idarəçilik qabiliyyəti, strateji təfəkkürü və uzaqgörənliyi sayəsində 1969-1982-ci illərdə Azərbaycan böyük bir inkişaf yolu qət edərək, keçmiş İttifaqın qabaqcıl respublikaları sırasına çıxdı. İmperiya tərkibində olmağımıza baxmayaraq, məhz həmin dövrdə Azərbaycanın gələcək siyasi və dövlət müstəqilliyi üçün əsaslı zəmin və möhkəm bünövrə yaradıldı.

Dövlətçiliyimizin müqəddəratının həll edildiyi, azadlığımızın və müstəqilliyimizin müdhiş təhlükə ilə üzləşdiyi 1993-cü ilin vahiməli iyun günlərində xalqın təkidli tələbi ilə Heydər Əliyev ölkə rəhbərliyinə qayıtdı. Uçurumun bir addımlığında dayanan Azərbaycanı məhv olmaq təhlükəsindən xilas etdi və 15 iyun xalqımızın Milli qurtuluş günü kimi tarixə düşdü. Sonrakı dövrdə müdrik rəhbərimizin əzmlə həyata keçirdiyi şərəfli xilaskarlıq və quruculuq missiyası Azərbaycanın müstəqilliyini əbədi, dönməz və sarsılmaz etmişdir.

Bu gün Azərbaycan beynəlxalq birliyin dəyərli üzvünə çevrilmişdir. Qafqaz bölgəsində sabitləşdirici rol oynayan, demokratik inkişaf yolu ilə qətiyyətlə irəliləyən dövlətimiz Avropa ilə Asiyanı daha sıx bağlayan nəhəng iqtisadi layihələrin təşəbbüsçüsü və təşkilatçısı kimi çox böyük nüfuz və etibar qazanmışdır.

Dövlətimiz nüfuzlu beynəlxalq qurumların bərabərhüquqlu üzvü, GUÖAM regional təşkilatının fəal iştirakçısıdır. Ən böyük nailiyyətlərimizdən biri Azərbaycanın Avropa Şurasına üzv qəbul edilməsidir. Bu mötəbər beynəlxalq təşkilatın tam hüquqlu üzvlüyünə qəbul edilməsi Azərbaycanın Avropaya inteqrasiyası yolunda son dərəcə mühüm mərhələ olmuşdur.

Dövlətimizin müstəqilliyini, xalqımızın əmin-amanlığını qorumağa, ölkəmizin ərazi bütövlüyünü bərpa etməyə qadir olan silahlı qüvvələr yaradılmışdır. Güclü milli ordumuz Ermənistan-Azərbaycan, Dağlıq Qarabağ münaqişəsinin beynəlxalq hüquq normaları və prinsipləri əsasında sülh yolu ilə nizama salınmasının etibarlı təminatçısıdır.

Ümummilli liderimizin 1993-cü ildən 2003-cü ilədək - on il ərzində misilsiz siyasi iradəsi, əzmi və qətiyyəti sayəsində Vətən və xalq naminə həyata keçirdiyi işləri sadalamaqla qurtarmaz. Həyatımızın elə bir sahəsi yoxdur ki, orada Heydər Əliyev dühası, Heydər Əliyev zəkası, Heydər Əliyev yanğısı silinməz izlər salmasın.

Heydər Əliyev müstəqil Azərbaycan dövlətçiliyinin memarı və qurucusu olduğu kimi, bugünkü Azərbaycan parlamentinin də banisidir. Ölkəmizdə qurulmuş hüquqi dövlətin bütün elementləri ilə yanaşı, Konstitusiyamız da, Milli Məclisimiz də onun yaradıcı zəkasının bəhrələridir. Ümummilli liderimiz 1993-cü il iyunun 15-dən oktyabrın 3-dək Azərbaycan Ali Sovetinin sədri vəzifəsində çalışmış, xalqın yekdil iradəsi ilə Prezident seçildikdən sonra isə dövlətimizin digər təsisatları ilə yanaşı, peşəkar parlamentin də formalaşması işində həlledici rol oynamışdır. 1995-ci il noyabrın 24-də I çağırış Milli Məclisin açılışında ümummilli liderimizin iştirakı, söylədiyi dərin məzmunlu nitq, verdiyi dəyərli tövsiyələr parlamentin fəaliyyət istiqamətlərinin müəyyən edilməsinə böyük kömək göstərmişdir. Sonrakı dövrdə də Heydər Əliyev dəfələrlə Milli Məclisin iclaslarında iştirak etmiş, qanunvericilik işinin səmərəsini artırmaq üçün öz qiymətli məsləhətlərini vermişdir. Biz, Milli Məclisin deputatları, ölkəmizdə peşəkar qanunvericilik orqanının formalaşması üçün Heydər Əliyevin çəkdiyi böyük zəhmətin şahidləriyik. Müstəqil dövlətimizin hüquqi bazasının yaradılıb inkişaf etdirilməsində onun əvəzsiz xidmətləri olmuşdur. Təkcə 1995-ci ildən sonra ümummilli liderimizin qanunvericilik təşəbbüsü qaydasında təqdim etdiyi layihələr üzrə 900-dən çox qanun qəbul olunmuşdur. Dəfələrlə parlamentimiz Heydər Əliyevin təklif etdiyi layihələr əsasında amnistiya aktları qəbul etmişdir. Şərq aləmində ilk dəfə olaraq ölüm cəzasının ləğv edilməsi məhz Heydər Əliyevin şəxsi təşəbbüsü ilə həyata keçirilən humanist aksiya olmuşdur.

2003-cü ildə Milli Məclis ümummilli liderimizin 80 illik yubileyinə həsr olunmuş “Heydər Əliyev və Azərbaycan parlamenti” kitabını hazırlayıb nəşr etmişdir. Bu nəfis kitab Heydər Əliyevin Azərbaycan xalqı və dövləti qarşısında misilsiz xidmətlərini, o cümlədən parlament quruculuğu sahəsində gördüyü möhtəşəm işləri işıqlandıran bir əsərdir. Kitabda ulu öndərimizin parlamentdəki çıxışları və deputatlarımızın bu dahi şəxsiyyət haqqında ürək sözləri toplanmışdır.

Azərbaycan xalqı xoşbəxtdir ki, bu gün dövlətimizə Heydər Əliyevin layiqli davamçısı möhtərəm İlham Əliyev rəhbərlik edir, ümummilli liderimizin başladığı taleyüklü işləri ardıcıl surətdə və qətiyyətlə həyata keçirir. Prezidentimizin ölkə daxilində və beynəlxalq aləmdə uğurlu fəaliyyəti hər birimizi ürəkdən sevindirir.

Bu günlər hamımız möhtərəm İlham Əliyevin Strasburqa səfərinin və Avropa Şurasında keçirdiyi səmərəli görüşlərin, bu mötəbər beynəlxalq qurumun yüksək tribunasından etdiyi dərin məzmunlu çıxışın təəssüratı ilə yaşayırıq. Cənab İlham Əliyevin Avropanın paytaxtına uğurlu səfəri Avropa Şurası ilə Azərbaycan Respublikası arasında son üç il ərzində addım-addım inkişaf etdirilən münasibətləri keyfiyyətcə yeni səviyyəyə qaldırdı. Dövlətimizin başçısı Azərbaycan həqiqətlərini bir daha dünyaya bəyan etdi.

Əziz dostlar! Bu gün ümummilli liderimiz Heydər Əliyevin Milli Məclisdə abidəsinin açılışı xalqımızın həyatında böyük tarixi bir hadisədir. Bu hadisə Azərbaycan dövlətinin memarı və qurucusu Heydər Əliyevə ümumxalq məhəbbətinin parlaq təzahürlərindən biridir.

Hörmətli mərasim iştirakçıları!

İcazə verin, ümummilli liderimiz Heydər Əliyevin abidəsinin açılışı mərasimində iştirakına, Milli Məclisə göstərdiyi diqqətə görə möhtərəm Prezidentimiz İlham Əliyevə hamımızın adından dərin təşəkkürümüzü bildirim.

Təntənəli mərasimi açıq elan edirəm.