SİYASƏT
Mina Eray: Fin ictimaiyyətinə Azərbaycanın ədalətli mövqeyini çatdırırıq
Helsinki, 24 aprel (AZƏRTAC). Azərbaycan bu gün sürətlə inkişaf edən ölkələr sırasındadır. Bunu onun artmaqda olan iqtisadiyyatı, siyasəti sübut edir.
Bu sözləri AZƏRTAC-a müsahibəsində Türkiyənin xaricdə yaşayan türklərlə iş komitəsinin Finlandiyadakı təmsilçisi Mina Eray demişdir.
Azərbaycan haqqında telekanallardan, qəzet və jurnallardan aldığımız informasiyalardan çox qürurlanırıq, - deyən M.Eray Bakının dünyanın ən gözəl şəhərlərindən birinə çevrildiyini vurğulamışdır.
Azərbaycan mədəniyyətinə valeh olduğunu qeyd edən M.Eray milli bayramımız olan Novruzun adət-ənənələrini Finlandiyada öyrəndiyini demişdir. O, bildirmişdir ki, Finlandiya-Azərbaycan Assosiasiyası ilə birlikdə milli bayramlarımızı qeyd edir, əlamətdar günlərlə bağlı tədbirlər keçirdirik. Türkiyənin xaricdə yaşayan türklərlə iş komitəsinin Finlandiya təmsilçiliyi olaraq yerli ictimaiyyəti Azərbaycanın reallıqları, Ermənistan-Azərbaycan, Dağlıq Qarabağ münaqişəsi ilə bağlı məlumatlandırır, onlara ölkəmizin ədalətli mövqeyini çatdırırıq.