Özbəkistan portalında Azərbaycanın turizm potensialı ilə bağlı material verilib
Daşkənd, 10 aprel, АZƏRTAC
Daşkənddəki kultura.uz portalında ölkəmizin turizm potensialı ilə əlaqədar rus dilində “Azərbaycan dünya turizm mərkəzinə çevrilir” sərlövhəli material yer alıb.
Bildirilir ki, ancaq son üç ayda Azərbaycana 557 min xarici turist gəlib. Azərbaycan mədəniyyət və turizm nazirinin sözlərinə görə turistlər əsasən Türkiyə, Rusiya, İran, Gürcüstan və ərəb ölkələrindən təşrif buyurub.
Materialda bu gün Bakıda açılacaq “Shopping Festival”ı barədə də məlumat verilir və deyilir ki, tədbir mayın 10-dək davam edəcək.
Yazılıb ki, Azərbaycana turist axını artdıqca “Shopping Festival”ın hər il keçirilməsi reallığı ortaya çıxır. Festival çərçivəsində bir sıra əyləncəli proqramların təşkili nəzərdə tutulur.
Məqalədə Bakıda keçiriləcək IV İslam Həmrəyliyi Oyunlarından da söhbət açılır. Bildirilir ki, mayın 12-dən 22-dək keçiriləcək idman bayramına güclü hazırlıq işləri görülür və oyunlara 50-dən çox ölkədən idmançılar qatılacaq.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
