PARİSDƏ AŞPA KOMİTƏSİNİN YIĞINCAĞI KEÇİRİLMİŞDİR
Əvvəlcə hollandiyalı deputat Leo Platvoyetin “Qadın alveri” mövzusunda məruzəsi dinlənilmişdir. Məruzəçi son zamanlar qadınların daha tez-tez qarşılaşdığı bir problemin - qadın alverinin Avropada geniş yayıldığını, bu vəziyyətə daha çox Şərqi Avropa ölkələrində rast gəlindiyini söyləmiş, incə məxluqların əşya kimi alınıb-satılmasının bəşəriyyət üçün necə təhlükələr yarada biləcəyini qeyd etmiş, Avropa Şurasının üzvü olan dövlətləri ümumi narahatlıq doğuran bu məsələ ilə ciddi mübarizə aparmağa çağırmışdır.
Məruzə ətrafında çıxış etmiş Azərbaycanın Avropa Şurası yanında nümayəndə heyətinin üzvü, Milli Məclisin deputatı Elmira Axundova qadın alverinə qarşı mübarizədə dövlətimizin təcrübəsinə toxunaraq bildirmişdir ki, bu məsələ başqa ölkələr kimi, Azərbaycan üçün də aktualdır. Azərbaycanda da iş adı altında aldatma yolu ilə qadınları ərəb ölkələrinə, Türkiyəyə və digər ölkələrə apararaq, onları pis yola düşməyə vadar edirlər. Azərbaycanda problemin qarşısını almaq üçün ciddi tədbirlər görülmüş Cinayət Məcəlləsinə 144-cü maddə əlavə edilmişdir. Əgər bir neçə il əvvəl qadınları pis yola təhrik edənlərə 3 il şərti cəza verilirdisə, Cinayət Məcəlləsinin yeni maddəsində onlara 5 ildən 8 ilədək ciddi rejimli həbs cəzası nəzərdə tutulmuşdur.
Bundan əlavə, respublikanın Daxili İşlər Nazirliyi tabeliyində insan alverinə qarşı mübarizə idərəsi yaradılmışdır və bu qurum səmərəli fəaliyyət göstərir.
Ölkəmizdə trafik qurbanlarının reabilitasiya mərkəzinin fəaliyyət göstərdiyini qeyd edən E.Axundova, təkcə keçən il hüquq mühafizə orqanlarının xarici ölkələrdəki 200 qadını xilas etdiyini, onların mərkəzdə bir-iki ay reabilitasiya keçdikdən sonra normal həyat şəraitinə qayıtdıqlarını bildirmişdir.
Azərbaycanlı deputat komitə üzvlərinin diqqətini ərəb ölkələrinə və Türkiyəyə iş dalınca və yaxud yaxın qohumlarını görməyə getmək istəyən 16-35 yaşlı gənc qızlardan və qadınlardan onların qardaş, ər və yaxud hər hansı qohum tərəfindən müşayiət edilməsi barədə xüsusi arayış tələb edildiyinə yönəltmiş və hazırda bu prosesin çox yaxşı nəticələr verdiyini göstərmişdir.
Yığıncaqda rusiyalı deputat Vera Oksinanın hazırladığı “Cənubi Qafqazda qadınların vəziyyəti” məruzəsi qızğın müzakirələrə səbəb olmuşdur.
Müzakirələrdə xüsusi fəallıq göstərmiş Elmira Axundova məruzədəki bəzi məqamlarla razılaşmadığını bildirmiş, Azərbaycanın əzəli torpağı Dağlıq Qarabağın və onun ətrafındakı yeddi rayonun Ermənistan tərəfindən işğalı, Ermənistanda yaşayan azərbaycanlıların öz doğma yurdlarından silah gücünə çıxarılması nəticəsində bir milyondan artıq qaçqın və məcburi köçkün ordusunun əmələ gəldiyini və onların çox ağır şəraitdə yaşadıqlarını qeyd etmişdir. Öz torpaqlarında qaçqın və məcburi köçkün kimi yaşayan bu insanlar arasında çoxlu qadın vardır. Qaçqınlıq və məcburi köçkünlük qadınlarımızın vəziyyətini ağırlaşdıran əsas amildir. Çadır şəhərciklərində məskunlaşmış bu qadınlar bütün hüquqlardan məhrum olmuşlar. Deputat bu məsələnin məruzədə ötəri şəkildə qeyd edilməsinə kəskin etirazını bildirmişdir. Məsələnin ümumi şəkildə verilməsinə irad tutmuş E.Axundova daha çox qaçqın və köçkünü olan Azərbaycandakı vəziyyətin xüsusi olaraq vurğulanmasını təkid etmişdir.
Milli Məclisin deputatı qaçqın və məcburi köçkünlərin şəraitinin yaxşılaşdırılması istiqamətində Azərbaycan dövlətinin müsbət addımlarının məruzədə öz əksini tapmamasına da etiraz etmişdir. Məruzədə ümumi şəkildə olsa da, çadır şəhərciklərində yaşayan qadınların ağır həyat şəraiti, onların adi yaşayış, təhsil hüquqlarından məhrum olmaları qeyd edildiyi halda, nədənsə dövlətimizin hazırlayaraq həyata keçirdiyi xüsusi proqram əsasında çadır şəhərciklərinin tədricən ləğv olunması, qaçqın və məcburi köçkünlər üçün müasir tipli və yaraşıqlı qəsəbələr salınması, yeni ildən bu problemin tamamilə aradan qaldırılması barədə söhbət açılmır. Deputat ölkəmizin bu istiqamətdə gördüyü işlərin məruzədə əks olunması təklifini irəli sürmüşdür.
Sonra E.Axundova məruzə ilə bağlı növbəti iradını bildirərək, Hollandiyadan olan deputat L.Platvoyetin hazırladığı məruzədə itkin düşmüş və girov götürülmüş insanlar barədə ətraflı danışıldığı halda, V.Oksinanın məruzəsində itkin düşmüş və girov götürülmüş qadınlar haqqında heç bir məlumat verilmədiyini qeyd etmişdir.
Rusiyalı deputatın məruzəsində Sovetlər İttifaqının süqutundan sonra müstəqillik əldə etmiş respublikalarda qadınların vəziyyətinin ağır olduğu göstərilmişdir.
Azərbaycanlı deputat pessimist ruhda yazılmış məruzə müəllifinin bu fikri ilə də qətiyyən razılaşmadığını bildirmiş, qadınların vəziyyətinin ağırlaşmasının başlıca səbəbinin münaqişələr olduğunu söyləmiş, Azərbaycan dövlətinin qadınların ictimai-siyasi həyatda fəallıq göstərmələrinə daim diqqət yetirdiyini, onların qayğısı ilə məşğul olmaq üçün yeni komitə və təşkilatlar yaradıldığını xüsusi vurğulamışdır.
Bölmənin digər xəbərləri
