PREZİDENT MİXAİL SAAKAŞVİLİ TBİLİSİDƏKİ CÜMƏ MƏSCİDİNDƏ OLUB

26.04.2004 [23:28]
Çap et
A⁺ A^-

AZƏRTAC-ın xüsusi müxbiri xəbər verir ki, Gürcüstan prezidenti Mixail Saakaşvili aprelin 25-də Tbilisidəki Cümə məscidində olmuşdur. Burada müsəlmanlarla görüşən prezident gürcü çarı Qurucu Davidi xatırlamış və demişdir ki, o, bütün dinlərə qulluq edən adamlarla müntəzəm görüşər, məscidə də gedərdi. Bu, qədim gürcü adətidir. Ayrı-ayrı dinlərə qulluq edənlər bizim onları dəstəklədiymizi, cəmiyyətimizin tamhüquqlu üzvü olduqlarını hiss etməlidirlər.

Axund Əli məscidə gəldiyinə görə prezidentə dindar müsəlmanlar adından təşəkkürünü bildirmiş, ona qədim Tbilisinin Şeytanbazar məhəlləsi əks olunmuş tablonu hədiyyə etmişdir.

Sonra prezident axundun iş otağında Gürcüstan parlamentinin azərbaycanlı üzvləri, energetika nazirinin müavini İ.Novruzov və başqaları ilə görüşmüş, Gürcüstan azərbaycanlılarını narahat edən məsələlərlə maraqlanmış, bunların tezliklə yoluna qoyulacağını vəd etmişdir.

Prezident məscidə gəlməzdən əvvəl yəhudilərin sinaqoquna da getmişdir.