Prokurorluq əməkdaşları Portuqaliyanın narkotik vasitələrə qarşı mübarizə sistemi ilə tanış olublar
Bakı, 23 yanvar, AZƏRTAC
Narkomaniyanın qlobal problem olaraq qaldığını, ona qarşı mübarizənin Azərbaycan dövlətinin prioritet istiqamətlərindən biri olmasını nəzərə alaraq, sistemli yanaşma və müsbət təcrübənin öyrənilməsi məqsədilə Baş Prokurorluğun əməkdaşlarından ibarət nümayəndə heyəti Avropa İttifaqının TAIEX proqramı çərçivəsində yanvarın 16-dan 18-dək Lissabon şəhərində səfərdə olublar.
Baş Prokurorluğun mətbuat xidmətindən AZƏRTAC-a bildirilib ki, səfərdə iştirak edən Baş Prokurorluğun Dövlət ittihamının müdafiəsi üzrə idarəsinin əməkdaşları - Anar Nəsibov, Murad Vəliyev, Vüsal Abdullayev və Valeh Ələkbərov Portuqaliyanın Narkomaniya ilə mübarizə üzrə milli koordinatoru və Narkomanların Davranışı və Asılılığına Müdaxilə Baş İdarəsinin rəhbəri Joao Goulao və Ədliyyə Polisinin Narkotik Satışı ilə Mübarizə Milli Birliyinin direktoru Artur Vaz ilə görüşlər keçiriblər.
Görüş çərçivəsində narkotiklərlə mübarizənin hüquqi aspektləri, narkotik maddə asılılığından əziyyət çəkən şəxslərin müalicəsi istiqamətində milli fəaliyyət planları və əldə olunmuş nəticələr barədə ətraflı məlumat verilib.
Səfərin növbəti mərhələsində nümayəndə heyəti Portuqaliya Baş Prokurorluğunun inzibati binasının yerləşdiyi Palmela sarayı ilə tanış olub, Prokurorluğun Cinayət işləri üzrə İstintaq və Əməliyyat İdarəsinin prokurorları ilə görüşərək ətraflı fikir mübadiləsi aparılıb, narkotiklərlə mübarizə sahəsində Portuqaliya və Azərbaycan qanunvericiliyinin oxşar və fərqli cəhətləri, effektiv mübarizə, qarşılıqlı əməkdaşlıq istiqamətində ətraflı fikir mübadiləsi aparılıb.
Bundan başqa, prokurorluq əməkdaşları Avropa İttifaqının Narkotiklər və Narkotikdən Asılılığın Monitorinqi Mərkəzinin nümayəndələri və digər aidiyyəti qurumların məsul əməkdaşları ilə görüşlər keçiriblər.
Səfər çərçivəsində nümayəndə heyətinə narkotik vasitələr və psixotrop maddələrdən istifadə ilə mübarizə sahəsində Avropa İttifaqının digər dövlətləri ilə Portuqaliya təcrübəsi arasında mövcud fərqlər, onların üstün və zəif cəhətləri, həmçinin əldə olunmuş nailiyyətlərlə bağlı geniş məlumat verilib.
Bölmənin digər xəbərləri
