Respublika Seysmoloji Xidmət Mərkəzinin Elmi-Texniki Şurasının növbəti iclası keçirilib
Bakı, 12 aprel, AZƏRTAC
Azərbaycan Milli Elmlər Akademiyası nəzdində Respublika Seysmoloji Xidmət Mərkəzinin Elmi-Texniki Şurasının (ETŞ) növbəti iclası keçirilib. Mərkəzin baş direktoru, AMEA-nın müxbir üzvü Q.Yetirmişli gündəliyi elan etdikdən sonra, geologiya-mineralogiya elmlər doktoru, professor Adil Əliyev “Palçıq vulkanının fəaliyyətinin aktivləşməsi-zəlzələ müjdəçisi” mövzusunda məruzəsini təqdim edib.
Mərkəzdən AZƏRTAC-a bildirilib ki, Azərbaycan Dövlət Neft Şirkətinin “Neftqazelmitədqiqatlayihə” İnstitutu “Seysmik kəşfiyyat” laboratoriyasının müdiri Tarverdi Niyazovun yer elmləri üzrə fəlsəfə doktoru elmi dərəcəsi almaq üçün təqdim etdiyi "Seysmik kəşfiyyat məlumatları əsasında Yevlax-Ağcabədi çökəkliyi strukturlarında Təbaşir çöküntülərinin daxili geoloji quruluşunun tədqiqi" mövzusunda dissertasiya işinin müzakirəsi olub.
İclasda, həmçinin ETŞ-nin gündəliyinə daxil olan digər məsələlərə - AMEA nəzdində RSXM-in “Geodinamika” şöbəsinin müdiri, geologiya-mineralogiya üzrə fəlsəfə doktoru İlyas Kazımovun dosent elmi adını almaq üçün namizədliyinin irəli sürülməsi və mərkəzdə çalışan doktorantlar və dissertantların elmi işlərinin yerinə yetirilməsi haqqında hesabatlara da baxılıb.
Bölmənin digər xəbərləri
