SANKT-PETERBURQDA XOCALI SOYQIRIMININ İLDÖNÜMÜNƏ HƏSR OLUNMUŞ KONFRANS KEÇİRİLMİŞDİR
Bakı, 27 fevral (AZƏRTAC). Azərbaycan Respublikasının Sankt-Peterburqdakı baş konsulluğunun mətbuat xidmətindən verilən məlumatda bildirilir ki, fevralın 26-da Rusiya Milli Kitabxanasında XX əsrin ən qanlı faciəsi olan Xocalı soyqırımının 18-ci ildönümünə həsr olunmuş konfrans keçirilmişdir.
Konfransda Sankt-Peterburq ictimaiyyətinin nümayəndələri, bir çox universitetlərin müəllim və professorları, şəhərdə akkreditə olunmuş diplomatik missiyaların rəhbərləri, Azərbaycan diasporunun üzvləri, tələbələrimiz və kütləvi informasiya vasitələrinin nümayəndələri iştirak etmişlər.
Konfransda Sankt-Peterburqda yaşayan tanınmış şair, əslən Qarabağdan olan Səid Hacıyevin konsulluq tərəfindən nəşr olunmuş “Xocalı qırğını” və Sankt-Peterburq Azərbaycanlıların Milli-Mədəni Muxtariyyətinin dəstəyi ilə nəşr edilmiş “Politika eto sudba” kitablarının təqdimatı keçirilmişdir.
Tədbirdə Sankt-Peterburq Azərbaycanlıların Milli-Mədəni Muxtariyyətinin sədri V.Məmişov Xocalı faciəsi barədə geniş məlumat vermiş, soydaşlarımızı, xüsusilə də tələbələrimizi və gənclərimizi Azərbaycanın tarixindəki qanlı səhifəni heç zaman unutmamağa, dövlətimizin nüfuzunun daha da artmasına öz töhfələrini verməyə çağırmışdır. Türkiyə, Ukrayna və Qazaxıstanın baş Konsulları, Qırğızıstanın fəxri konsulu, Sankt-Peterburq Dövlət Universitetinin professoru R.Kostyuk və tarix elmləri namizədi N.Niyazov çıxışlarında Xocalıda törədilmiş vəhşiliklərin gələcəkdə təkrar olunmaması üçün bütün vasitələrdən istifadə edilməsinin vacibliyini vurğulamış, Azərbaycan xalqının kədərinə şərik çıxdıqlarını bildirmişlər.
Baş konsul Q.Osmanov çıxışında Azərbaycan Prezidenti İlham Əliyevin apardığı daxili və xarici siyasət nəticəsində Azərbaycanın beynəlxalq aləmdə nüfuzunun gündən-günə artdığını bildirmiş, Xocalı soyqırımının dünya ictimaiyyəti tərəfindən tanınması istiqamətində İslam Konfransı Təşkilatı Gənclər Forumunun mədəniyyətlərarası dialoq üzrə baş əlaqələndiricisi Leyla xanım Əliyevanın irəli sürdüyü “Xocalıya ədalət” beynəlxalq kampaniyasının geniş vüsət aldığını, nüfuzlu İslam Konfransı Təşkilatının Parlament İttifaqı tərəfindən qəbul olunmuş qətnamə barədə konfrans iştirakçılarına geniş məlumat vermiş və gəncləri beynəlxalq kampaniyada fəal iştirak etməyə çağırmışdır.
Tədbirin iştirakçıları Xocalıda törədilmiş vəhşilikləri əks etdirən fotosərgi ilə tanış olmuş və onlara faciə barədə nəşr edilmiş kitablar təqdim olunmuşdur. Bundan əlavə, iştirakçılara Heydər Əliyev Fondu tərəfindən hazırlanmış “Qarabağ həqiqətləri” məlumat toplusu paylanmışdır.
Konfransın sonunda nüfuzlu beynəlxalq qurumlara ünvanlanmış Bəyannamə qəbul olunmuş və imzalar toplanmışdır. Günahsız qurbanların ruhuna dualar oxunmuş və Azərbaycan mətbəxi mərkəzində (“Bakı” restoranı) ehsan verilmişdir.
Sankt-Peterburqun aparıcı gündəlik qəzeti olan “Veçerni Peterburq”da baş konsul Q.Osmanovun Xocalı faciəsi haqqında müsahibəsi dərc edilmiş, yerli “Ren TV” telekanalında konfrans barəsində videosüjet nümayiş olunmuş, baş konsulluq tərəfindən mətbuat məlumatı hazırlanaraq Rusiyanın informasiya agentliklərinə təqdim edilmişdir.
Xocalı faciəsi ilə bağlı kitablar, broşürlər şəhər kitabxanalarına paylanmışdır.
######
Bölmənin digər xəbərləri
