Sapporoda 64-cü Beynəlxalq qar fiqurları festivalı başa çatmışdır
Sapporo, 11 fevral (AZƏRTAC). Fevralın 11-də Yaponiyanın Hokkaydo adasında yerləşən Sapporo şəhərində 64-cü qar fiqurları festivalı -“Yuki Maçuri” başa çatmışdır.
Bu il fevralın 5-də başlamış ənənəvi Sapporo qar və buz fiqurları festivalı məşhur beynəlxalq tədbirə çevrilmişdir və davam etdiyi bir həftə ərzində öz ətrafına milyonlarla insan toplamışdır. Burada nümayiş etdirilən qar və buz fiqurları isə onlarla ölkədən gəlmiş həvəskar heykəltəraşlar düzəltmişlər.
Festival şəhərin üç yerində - Odori parkında, Susikino küçəsi boyunca və Tsudome stadionunda təşkil edilmişdir. Həmin yerlərdə ümumilikdə 300-dən artıq müxtəlif ölçülü fiqurlar düzəldilmişdir.
Susikino küçəsi boyunca əsasən buzdan yonulmuş heykəllər yerləşdirilmişdir. Buradakı cizgi və animasiya filmlərinin, yapon nağıllarının qəhrəmanlarının, müxtəlif heyvanların heykəlləri tamaşaçıların zövqünü oxşamışdır.
Gündüz saatlarından başlayan festival gecədən keçənə qədər davam etmiş, müasir texnologiyaların köməyi ilə gecə vaxtı işıqlandırılan fiqurlar əsl nağıllar aləmini xatırlatmışdır.
Festival çərçivəsində təşkil olunan müxtəlif karnavallar, sərgilər, qar topu oyunu iştirakçıların vaxtlarını əyləncəli keçirməsinə xidmət etmişdir. Eyni zamanda, iştirakçılar xüsusi olaraq təşkil olunmuş yapon milli yeməkləri ilə də tanış olmuş, “qatar”da səyahətə çıxmış, xatirə hədiyyələri almışlar.
Rusiyadan gəlmiş iş adamı Olqa Belinskaya AZƏRTAC-ın Yaponiyadakı xüsusi müxbirinə bildirmişdir ki, Sapporo festivalı çox gözəldir. Mən azərbaycanlı turistləri də buraya dəvət edirəm, gəlin siz də baxın. Qardan düzəldilmiş fiqurlar gecələr çox gözəl işıqlandırılır. Onları çox gözəl düzəldiblər. Biz burada Rusiyadan gətirdiyimiz matryoşkaları çox yaxşı satırıq. Burada həm də rəqs edir, mahnı oxuyuruq. Bizim həm də rus yeməkləri çadırımız vardır. Mən bilirəm ki, Azərbaycanın da çox yaxşı mətbəxi, suvenirləri vardır. Mən sizi Sapporo festivalına dəvət edirəm.
Vüqar Ağayev
AZƏRTAC-ın xüsusi müxbiri
Sapporo
Bölmənin digər xəbərləri
