ŞƏKİDƏ XOCALI FACİƏSİ QURBANLARININ XATİRƏSİ ANILMIŞDIR
Şəki, 26 fevral (AZƏRTAC). Fevralın 26-da Şəki Şəhər İcra Hakimiyyətində Xocalı faciəsinin 18-ci ildönümü ilə əlaqədar anma mərasimi keçirilmişdir.
Şəhər icra hakimiyyəti başçısının müavini Zərinə Cavadova Xocalı faciəsinin Azərbaycan tarixinə qanla yazılmış çox ağrılı bir səhifə olduğunu bildirmiş, faciənin ildönümü ilə bağlı rayonda silsilə tədbirlərin həyata keçirildiyini diqqətə çatdırmışdır. Qeyd etmişdir ki, keçirilən bu tədbirlərdə faciənin mahiyyəti və acı nəticələri bir daha xatırlanır, ermənilərin xalqımıza qarşı həyata keçirdiyi təcavüzkar işğalçılıq siyasəti qətiyyətlə pislənilir.
Sonra Xocalı faciəsinin dəhşətli anlarını özündə əks etdirən sənədli film nümayiş etdirilmişdir.
Şəhər icra hakimiyyəti aparatının şöbə müdiri Rəfael Mənəfovun “Xocalı əsrimizin faciəsidir” mövzusunda məruzəsində faciənin başvermə səbəbləri, mahiyyəti, erməni cəlladlarının vəhşilikləri konkret faktlarla bir daha xatırlanmış, Xocalı müdafiəçilərinin qəhrəmanlığından bəhs edilmişdir. Natiq bildirmişdir ki, erməni təcavüzkarlarının xalqımıza qarşı törətdiyi növbəti soyqırımı 613 nəfərin, o cümlədən 106 qadının, 63 uşağın, 70 qocanın həyatına son qoymuş, 487 nəfər şikəst olmuş, 1275 dinc sakin əsir götürülmüş, 150 nəfər itkin düşmüşdür. Bu əməllərin qabaqcadan düşünülmüş qaydada, milli əlamətinə görə insanların tamamilə və ya qismən məhv edilməsi niyyəti ilə törədilməsi beynəlxalq hüquqa əsasən məhz soyqırımı olduğunu sübut edir. Erməni qəsbkarlarının törətdiyi bu vəhşilik və vandalizm aktı tərəqqipərvər bəşəriyyətin genosid kimi tanıdığı Xolokost, Xatın faciələri ilə eyni səviyyədə qiymətləndirilməlidir.
Məruzə və çıxışlarda xüsusi vurğulanmışdır ki, yalnız ümummilli liderimiz Heydər Əliyevin yenidən hakimiyyətə qayıdışından sonra Xocalı soyqırımına düzgün hüquqi-siyasi qiymət verilmiş, bu hadisələrin dünya ictimaiyyətinə çatdırılması istiqamətində mühüm işlər görülmüşdür.
Qeyd olunmuşdur ki, müasir dövrdə ideoloji təbliğatın mühüm əhəmiyyət kəsb etdiyini nəzərə alan Heydər Əliyev Fondu ötən müddət ərzində Azərbaycan həqiqətlərini, Ermənistan- Azərbaycan münaqişəsinin əsil mahiyyətini beynəlxalq ictimaiyyətə çatdırmağa xüsusi əhəmiyyət vermiş, dünyanın bir sıra ölkələrində Xocalı soyqırımının ildönümü ilə bağlı silsilə tədbirlər, aksiyalar keçirilmiş, Fondun hazırladığı təbliğat materialları paylanmışdır.
Tədbirdə Xocalıdan olan məcburi köçkün Eldəniz Məhərrəmov, Çələbixan qəsəbə köçkünlər orta məktəbinin direktoru Ələddin Əhmədov, Laçın Rayon İcra Hakimiyyətinin Şəki rayonu üzrə səlahiyyətli nümayəndəsi Məhəmməd Şükürov çıxış edərək qaçqın və məcburi köçkünlərin sosial problemlərinin həllinə göstərilən yüksək dövlət qayğısına görə Prezident İlham Əliyevə minnətdarlıqlarını bildirmişlər.
Tədbirin sonunda rayonda məskunlaşmış Xocalıdan olan 92 ailəyə şəhər icra hakimiyyəti tərəfindən maddi yardım göstərilmişdir.
Bölmənin digər xəbərləri
