SİYASƏT
Strasburqda Ermənistan nümayəndəsinin Avropa Şurasının iradəsi əleyhinə çıxması tənqid edildi
Avropa naminə Liberal və Demokratların Alyansı (ALDE) partiya qrupunun iclasında Dağlıq Qarabağ regionu və Azərbaycanın digər işğal edilmiş əraziləri ilə bağlı məsələ də nəzərdən keçirilib.
Xatırladaq ki, AŞPA bürosu bir müddət əvvəl keçirilmiş iclasında Dağlıq Qarabağ regionu və Azərbaycanın işğal edilmiş digər ərazilərində vəziyyətlə bağlı yeni məruzənin hazırlanması məsələsinə müsbət münasibətini ifadə etmiş və mövzu üzrə məruzəçi təyin edilməsi üçün siyasi işlər və demokratiya komitəsinə müraciət etmişdir. Bu, Ermənistan siyasi dairələrində ciddi narahatlıq doğurduğundan onlar məsələnin müsbət həllinə mane olmaq üçün müxtəlif təxribatlara əl atmaqdadırlar.
ALDE partiya qrupunun iclasında Ermənistan nümayəndəsi çıxış edərək problem üzrə məruzəçi təyin edilməsinə ehtiyac olmadığını bildirib, bunu Dağlıq Qarabağ münaqişəsinin həllinin ATƏT-in Minsk qrupunun səlahiyyətində olması ilə izah edib.
Azərbaycanın AŞPA-dakı nümayəndə heyətinin üzvü Rafael Hüseynov bu iddianın əsassızlığını konkret sübutlar və məntiqi dəlillərlə rədd edərək deyib: “Məlum bir həqiqətdir ki, münaqişə varsa onu həll etməyə çalışmaq lazımdır. Bunun üçün dialoq, müzakirələr lazımdırsa, belə müzakirələrdən qaçmaq yox, onların baş tutmasına, davamlı olmasına çalışmaq lazımdır. Zənnimcə, büronun təklif etdiyi və siyasi komitəyə göndərməyi tövsiyə etdiyi sərlövhə mahiyyəti dolğun və dəqiq ifadə edir. Məhz Dağlıq Qarabağ və Azərbaycanın işğal edilmiş digər ərazilərində son dövrlərdə getdikcə artan gərginlik belə bir zərurəti doğurub. Ona görə də bu mövzunun siyasi komitədə müzakirəsinə, bununla bağlı ayrıca məruzəçinin təyin edilməsinə ciddi əsaslar var. Münaqişədə olan hər iki ölkə monitorinq altındadır. Lakin monitorinqlə bağlı hesabatlarda ayrı-ayrı problemlər barədə ümumi bəhs etmək lazım gəlir. İşğal problemi, son dövrdə işğal altındakı ərazilərdə zor tətbiqinin şiddətlənməsi, gərginliyin kəskin həddə qədər artması isə bütün bunları ayrıca, təfərrüatı ilə araşdırmağı tələb edir. Bundan qorxmaq, ehtiyatlanmaq lazım deyil. Bu, həqiqətləri aşkarlamaq və düzgün həll formaları tapmaq üçün gərəkdir. Belə müzakirələrin qarşısını almağa çağırışlar bir tərəfdən zəiflik əlamətidirsə, digər tərəfdən öz haqsızlığını irəlicədən etiraf etmək deməkdir.
Mən məsələnin monitorinq komitəsinə yönəldilməsini qəti şəkildə məqsədəuyğun saymıram. Büronun tövsiyəsi tamamilə obyektivdir və ona əməl etmək lazımdır. Bunun əleyhinə istənilən çağırış məntiqə ziddir və Assambleyanın iradəsi əleyhinə hərəkət etmək deməkdir”.
Müzakirələrdə çıxış edən britaniyalı deputat Maykl Hankok da Rafael Hüseynovun mövqeyini müdafiə edərək deyib ki, Dağlıq Qarabağ problemi regionda cərəyan edən proseslər kontekstində mütləq yenidən diqqətlə araşdırılmalı və yeni məruzə hazırlanmalıdır.
Diskussiyaya qatılan isveçrəli deputat Fiala Doris, moldovalı deputat Anna Qutu və digərləri qeyd ediblər ki, ATƏT-in Minsk qrupunun bu problemlə məşğul olması heç vəchlə Avropa Şurasının Dağlıq Qarabağ münaqişəsi ilə bağlı fəaliyyətini zəiflətməsinə gətirib çıxarmamalıdır. Əksinə, Avropa Şurası üzv ölkələr arasında münaqişənin danışıqlar vasitəsilə həllinə mümkün töhfələrini verməkdə ardıcıl olmalıdır və yeni məruzənin hazırlanması da belə addımlardan biri ola bilər.
Əsgər Əliyev
AZƏRTAC-ın xüsusi müxbiri
Strasburq