Tehranda ümummilli lider Heydər Əliyevin xatirəsi yad edilib
Tehran, 7 may, AZƏRTAC
Mayın 7-də Azərbaycanın İrandakı səfirliyində xalqımızın ümummilli lideri Heydər Əliyevin anadan olmasının 92-ci ildönümü münasibətilə tədbir keçirilib.
Tədbirdə İranın dövlət və hökumət nümayəndələri, Tehrandakı diplomatik korpusun və beynəlxalq təşkilatların, ictimaiyyətin təmsilçiləri, İranda təhsil alan azərbaycanlı və xarici tələbələr iştirak ediblər.
Əvvəlcə Ulu Öndərin xatirəsi bir dəqiqəlik sükutla yad edildi, onun həyatından və siyasi fəaliyyətindən bəhs edən sənədli film nümayiş olundu.
Azərbaycanın İrandakı səfiri Cavanşir Axundov çıxış edərək bildirdi ki, ölkəmizin son otuz ildən artıq bir dövrünü əhatə edən tarixi taleyi Heydər Əliyevin adı ilə qırılmaz tellərlə bağlıdır. Bu illər ərzində xalqın ictimai-siyasi, iqtisadi və mədəni həyatının bütün sahələrində dirçəliş məhz onun fəaliyyəti ilə əlaqədardır. Heydər Əliyevin müstəqil Azərbaycanın rəhbərliyinə qayıdışı ilə beynəlxalq norma və prinsiplərə uyğun müstəqil dövlət quruculuğu prosesi başlandı.
Heydər Əliyev Azərbaycanın təbii sərvətlərindən, əlverişli coğrafi-strateji mövqeyinin üstünlüklərindən ölkənin milli mənafelərinə uyğun şəkildə istifadə edilməsinə yönəldilmiş siyasət həyata keçirib, irimiqyaslı beynəlxalq iqtisadi sazişlərin işlənib hazırlanmasında son dərəcə gərgin və səmərəli fəaliyyət göstərib. 1994-cü ilin sentyabrında "Əsrin müqaviləsi" adlandırılan ilk neft müqaviləsinin imzalanması və onun gerçəkləşdirilməsi müstəqil Azərbaycanın iqtisadi inkişaf konsepsiyasını təşkil edən neft strategiyasının tərkib hissəsi olub və Azərbaycanın gələcək inkişafına əvəzolunmaz töhfəsini verib.
Heydər Əliyevin apardığı daxili siyasət Azərbaycanın hər bir vətəndaşına azad, sərbəst yaşamaq hüquqlarını təmin etmək və öz rifahını yaxşılaşdırmaq imkanları yaratmağa yönəlmişdi. Ulu Öndərin fəaliyyətində iqtisadi islahatlar, bazar iqtisadiyyatının bərqərar olması, iqtisadi inkişafın təmin edilməsi, Azərbaycanın dünya iqtisadiyyatına inteqrasiyası ardıcıl prioritet sahələr idi. Ümummilli Lider demokratik, hüquqi dövlət quruculuğu istiqamətində davamlı siyasət yeridərək ölkədə insan hüquq və azadlıqlarının başlıca prinsiplərinin bərqərar olması üçün əsaslı zəmin yaratdı. Onun rəhbərliyi altında Azərbaycan dövlətinin xarici siyasəti, dünyanın aparıcı dövlətləri və beynəlxalq təşkilatları ilə əlaqələri milli maraqlara və siyasi perspektivlərə əsaslanaraq inkişaf edib. Ümummilli Liderin xarici siyasətinin əsasını sülh, beynəlxalq hüquq normalarına, sərhədlərin bütövlüyünə və toxunulmazlığına, dövlətlərin ərazi bütövlüyünə hörmət və qarşılıqlı faydalı əməkdaşlıq prinsipləri təşkil edirdi. Onun sülhsevər xarici siyasətinin əsasında isə ilk növbədə milli müstəqilliyin möhkəmləndirilməsi, dövlətlərin hüquqlarına hörmətlə yanaşılması, bütün mübahisəli məsələlərin sülh və danışıqlar yolu ilə həll edilməsi, qarşılıqlı surətdə faydalı iqtisadi, elmi və mədəni əməkdaşlıq yaradılması, dövlətlərarası əlaqələrə mane olan hər cür məhdudiyyətlərin aradan qaldırılması prinsipləri dayanırdı.
Ümummilli lider Heydər Əliyev tərəfindən yaradılan iqtisadiyyatın Azərbaycan modelini bu gün Prezident İlham Əliyev uğurla davam etdirir. Azərbaycan artıq inkişafın elə bir səviyyəsinə gəlib çatıb ki, borc alan ölkədən borc verən ölkəyə çevrilib. Heydər Əliyev irsinə sadiq qalaraq son on il ərzində həyata keçirilən siyasi-iqtisadi islahatlar nəticəsində Azərbaycanda iqtisadiyyat real ifadədə 3 dəfədən çox, dövlət büdcəsi 19 dəfə artıb, yoxsulluğun səviyyəsi 49 faizdən 5 faizə enib, 1 milyondan artıq yeni iş yeri açılıb. Bu gün Azərbaycanın xarici valyuta ehtiyatı 50 milyard dollardan artıqdır. Təxminən yarım əsrə yaxın dövrü əhatə edən siyasi fəaliyyətini tam şəkildə Azərbaycan xalqının dövlətçilik tarixinə həsr edən Heydər Əliyev 1993-cü ildə siyasi hakimiyyətə qayıdandan sonra onun müəyyən etdiyi mehriban qonşuluq və səmimi dostluq siyasəti uğurlu nəticələr verib. Bu siyasət nəticəsində Azərbaycan-İran münasibətlərində qarşılıqlı etimad və inkişaf mərhələsi yaranıb. Ötən dövrdə iki qonşu dövlət arasında ticarət dövriyyəsi artıb, gömrük-keçid məntəqələrinin sayı çoxalıb, beynəlxalq təşkilatlarda əməkdaşlıq əlaqələri gücləndirilib, qarşılıqlı faydalı əməkdaşlığa dair ardıcıl işlər aparılıb, münasibətlərin inkişafına təsir edə bilən və qarşılıqlı faydalı nəticələrə hesablanmış məsələlər intensiv müzakirə olunur.
İki ölkə arasında münasibətlərin inkişaf dinamikasının qorunması siyasəti Prezident İlham Əliyev tərəfindən də uğurla davam etdirilir. Ötən il aprelin 9-da Prezident İlham Əliyevin İrana rəsmi səfəri, imzalanmış sazişlər bir daha göstərdi ki, qonşu, dost və tərəfdaş dövlətlər olan İran ilə Azərbaycan arasındakı mövcud münasibətlər bundan sonrakı dövrdə də yüksələn xətt üzrə inkişaf edəcək.
Sonra səfirliyin əməkdaşları Tariyel İsmayılov, Taleh Zöhrabov və başqaları çıxış edərək müasir Azərbaycan dövlətinin qurucusu, görkəmli dövlət xadimi Heydər Əliyevin həyat yolundan, siyasi fəaliyyətindən və tarixi xidmətlərindən danışıblar.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
