Tokio, 12 mart (AZƏRTAC). Tokionun Vaseda Universitetinin beynəlxalq münasibətlər fakültəsinin azərbaycanlı magistri Emil Cəfərzadə “Ryuqakusey qa sensey“ (“Əcnəbi tələbə müəllimdir”) proqramı çərçivəsində martın 12-də Tokio rayonunun Haçioci şəhərinin Şouyou orta məktəbində Azərbaycan haqqında təqdimatla çıxış etmişdir.

E.Cəfərzadə bildirmişdir ki, “Kokusay Rikay Şien Kyokay“ (“Beynəlxalq qarşılıqlı anlaşmaya dəstək Assosiasiyası”) qeyri-hökumət təşkilatının proqramına qatılmaqda məqsədi sürətlə inkişaf edərək regionun lider dövlətinə çevrilmiş Azərbaycan Respublikasını yaponiyalı məktəblilərə daha yaxından tanıtmaqdır.

Ötən ilin iyunundan başlamış proqram çərçivəsində artıq 15 məktəbdə təqdimatla çıxış etdiyini qeyd edən magistr bu tədbirlərdə 700-dən artıq yapon məktəblisinin iştirak etdiyini demişdir. Bunun bir vətənpərvərlik işi olduğunu vurğulayan E.Cəfərzadə sürətlə inkişaf edən Azərbaycanın tarixi, dili, mədəniyyəti, qədim adət-ənənələri, milli geyimləri, idmanı və mətbəxi haqqında məlumatların məktəblilər tərəfindən xüsusi maraqla qarşılandığını bildirmişdir. Növbəti təqdimat yel çərşənbəsinə təsadüf etdiyinə görə magistr Novruz bayramı, yazın gəlişini bildirən bu qədim el şənliyinin xüsusiyyətləri barədə də yapon məktəblilərinə ətraflı məlumat vermişdir.

Azərbaycanla bağlı əyani vəsaitlərin - dövlət bayrağının, müxtəlif ədəbiyyatların, xəritələrin, CD və DVD-lərin əldə olunmasına göstərdiyi yardıma görə Azərbaycanın Yaponiyadakı səfirliyinə minnətdarlığını bildirən E.Cəfərzadə, bunlardan dərs zamanı səmərəli istifadə etməyə çalışdığını söyləmişdir. Xalqımızın qədim tarixə, zəngin mədəniyyətə, dahi şəxsiyyətlərə malik olduğunu bildirən magistr müstəqilliyimizin bərpasından ötən 22 ildə qazanılmış uğurlar barədə də yaponiyalı yeniyetmələri məlumatlandırdığını qeyd etmişdir.

“Əcnəbi tələbə müəllimdir” proqramının icraçı direktoru Keniçi Tomiyama AZƏRTAC-ın Yaponiyadakı xüsusi müxbirinə demişdir ki, proqramın məqsədi yapon məktəblilərini dünya xalqlarının mədəniyyəti ilə yaxından tanış etmək, onları həmin mədəniyyətə hörmət ruhunda tərbiyə etməkdir. Sürətlə inkişaf edərək Qafqaz regionunun ən güclü iqtisadiyyata malik ölkəsinə çevrilmiş Azərbaycan haqqında təqdimat yaponiyalı məktəblilər tərəfindən böyük maraqla qarşılanır.

E.Cəfərzadənin proqramın fəal iştirakçısı olduğunu vurğulayan K.Tokiyama, onun Azərbaycan haqqında təqdimatlarının məktəblilər tərəfindən xüsusi həvəslə dinlənildiyini də bildirmişdir.

Proqram çərçivəsində Tokio məktəblərində Azərbaycanla bağlı təqdimatlar E.Cəfərzadə Yaponiyada təhsilini başa vuranadək davam edəcəkdir.

Vüqar Ağayev

AZƏRTAC-ın xüsusi müxbiri

Tokio