Turizm sahəsində kadr hazırlığı ilə bağlı məsələlər müzakirə edilmişdir
Bakı, 12 iyul (AZƏRTAC). Mədəniyyət və Turizm Nazirliyi iyulun 12-də Bakı Turizm Peşə Məktəbində “Turizm sahəsində kadr hazırlığı: nailiyyətlər, problemlər və əsas vəzifələr” mövzusunda müşavirə keçirmişdir.
AZƏRTAC xəbər verir ki, müşavirədə iştirak edən turizm sənayesinin nümayəndələri əvvəlcə Bakı Turizm Peşə Məktəbinin yeni təmirdən çıxmış binasını gəzmiş, ayrı-ayrı otaqlardakı tədris ləvazimatları ilə tanış olmuşlar.
Müşavirədə çıxış edən mədəniyyət və turizm naziri Əbülfəs Qarayev turizm sənayesi üçün rəqabətədözümlü mütəxəssislərin hazırlanması istiqamətində görülmüş işlərdən danışmışdır.
Prezident İlham Əliyevin müvafiq Sərəncamı ilə 2006-ci ildə Azərbaycan Turizm İnstitutunun yaradıldığını, bu ildən isə Bakı Turizm Peşə Məktəbinin fəaliyyət göstərdiyini qeyd edən nazir turizm sahəsi üçün peşəkar kadrların hazırlanmasına dövlətimizin başçısının xüsusi diqqət yetirdiyini bildirmişdir. Ə.Qarayev demişdir ki, Azərbaycan Turizm İnstitutunu bitirən məzunların 90 faizi işlə təmin olunur və yay mövsümündə institutun tələbələri dünyanın 6-7 ölkəsində təcrübə keçirlər.
Son 5 ildə Azərbaycanda turizm sahəsində çalışanların sayının artdığını deyən nazir bildirmişdir ki, əgər əvvəllər bu sahədə 3-4 min nəfər çalışırdısa, indi onların sayı 10 minə çatır.
Azərbaycanda turizmin sürətlə inkişaf etdiyini vurğulayan nazir demişdir ki, əgər 5 il bundan əvvəl Azərbaycan hər il orta hesabla 1 milyon 200 min turist qəbul edirdisə, hazırda bu rəqəm 2 milyon 200 minə çatmışdır.
Nazir onu da qeyd etmişdir ki, bu ilin sentyabr ayından mehmanxanalara və turizm şirkətlərinə lisenziyaların verilməsi internet vasitəsilə aparılacaqdır. Hazırda ölkədə 178 turizm şirkəti, 500-dən artıq mehmanxana və buna bənzər turizm obyektləri mövcuddur. İndiyə kimi 400-dək mehmanxanaya lisenziya verilmişdir.
Tədbirdə Azərbaycan Turizm İnstitutunun (ATİ) rektoru Cəfər Cəfərovun “Azərbaycanda turizm sahəsi üzrə kadr hazırlığı və bu prosesdə ATİ-nin yeri və rolu”, Bakı Turizm Peşə Məktəbinin direktoru İkram Məmmədovun “Turizm sahəsində xidməti personalın hazırlığı” mövzularında məruzələri dinlənilmişdir.
Sonra mövzu ətrafında müzakirələr aparılmışdır
Müzakirələrdə milli iqtisadiyyatımızın strateji istiqaməti sayılan turizmin inkişafının bu sahədə çalışan kadrların hazırlıq və peşəkarlıq səviyyəsindən asılı olduğu bildirilmiş, həmçinin turizm sahəsinə ölkə ictimaiyyətinin diqqətinin artırılmasının vacibliyi vurğulanmışdır.
Bölmənin digər xəbərləri
