“Turizm sənayesi üçün peşəkar gənclərin hazırlanması” layihəsi başa çatmışdır
Bakı, 9 yanvar (AZƏRTAC). Azərbaycan Gənclər Fondunun maliyyə dəstəyi ilə “Şəfəq” Ekoturizm İctimai Birliyi tərəfindən həyata keçirilən “Turizm sənayesi üçün peşəkar gənclərin hazırlanması” layihəsi başa çatmışdır.
Fondun mətbuat xidmətindən AZƏRTAC-a bildirmişlər ki, layihə çərçivəsində Lənkəran, Astara, Masallı, Lerik, Yardımlı və Cəlilabad rayonlarının gəncləri üçün bir sıra maarifləndirici görüşlər keçirilmişdir. Görüşlərdə Azərbaycanın cənub rayonlarında turizmin inkişaf prespektivləri müzakirə olunmuşdur. Tədbirlərdə “Azərbaycan gəncliyi 2011-2015-ci illərdə” Dövlət Proqramı haqqında məlumat verilmiş, gənclərə dövlət qayğısından danışılmışdır.
Bundan əlavə, Qəbələ rayonunda “Bələdçi (gid) xidməti sahəsində peşəkar gənclərin hazırlığı” mövzusunda 5 günlük təlim kursu keçirilmişdir. Təlimdə 15 rayondan 18 gənc iştirak etmişdir. İştirakçılar bələdçiliyin təşkili və digər mövzularla bağlı məlumatlandırılmışlar.
“Qeydiyyatçı (reception) xidməti sahəsində peşəkar gənclərin hazırlığı” mövzusunda ikinci təlim isə Lerik və Masallı rayonlarında təşkil olunmuşdur.
Hər iki təlim kursunun iştirakçılarına sertifikatlar verilmişdir.
Bölmənin digər xəbərləri
