“Turizmin inkişafı sahəsində gənclərin rolunun artırılması” layihəsi həyata keçiriləcəkdir
Bakı, 23 iyul (AZƏRTAC). “Azad Gənclər” İctimai Birliyi Azərbaycan Respublikası Gənclər və İdman Nazirliyinin maliyyə dəstəyi ilə “Turizmin inkişafı sahəsində gənclərin rolunun artırılması” layihəsini həyata keçirəcəkdir.
İctimai Birlikdən AZƏRTAC-a bildirmişlər ki, layihə çərçivəsində iki qrup gənclər üçün “Turizm sahəsində biznes-planların hazırlanması” mövzusunda təlim kursları təşkil ediləcəkdir.
Təlimlərin Masallı və Xaçmaz rayonlarında keçirilməsi nəzərdə tutulmuşdur.
Layihənin məqsədi gənclərin biznes biliklərinin artırılması və sahibkarlıq fəaliyyətinə həvəsləndirilməsidir. Gənclər bu layihədə iştirak etməklə turizm sahəsində biznes-plan hazırlamaq, sahibkarlıq fəaliyyətinə başlamaq və idarəçiliyin əsaslarına yiyələnmək imkanı qazanacaqlar.
Təlim kursları müasir təhsil metodlarına əsaslanaraq həyata keçiriləcəkdir. Təlim zamanı paylama materialı, təqdimatlar, qrup oyunları olacaq və tədris prosesində interaktivlik təmin ediləcəkdir.
İştirakçılara turizm sahəsinə aid normativ-hüquqi baza və dövlət proqramları haqqında məlumat veriləcək, biznes-planların hazırlanmasına dair təlimlər keçiriləcəkdir.
Bölmənin digər xəbərləri
