TÜRK VƏ AZƏRBAYCAN DİASPORLARININ BİRGƏ FƏALİYYƏTİ SAHƏSİNDƏ MÜHÜM İŞLƏR GÖRÜLÜR
Onlar ümummilli lider Heydər Əliyevin dünya azərbaycanlılarının 1-ci qurultayındakı dərin məzmunlu nitqinin əsas müddəalarını, ulu öndərin “Türkiyə ilə Azərbaycan bir millət, iki dövlətdir” kəlamını xatırladaraq, müxtəlif ölkələrdəki türk və Azərbaycan diasporlarının təşkilatlanması, birliyi, əsas məsələlərdə vahid mövqedən çıxış etmələri sahəsində xeyli işlər görüldüyünü faktlarla söyləmişlər. Azərbaycan Prezidenti İlham Əliyevin türkdilli dövlətlərin və topluluqlarının Antalyada keçirilən X dostluq, əməkdaşlıq və qardaşlıq qurultayındakı nitqini, gələn il Bakıda Türkiyə-Azərbaycan diaspor təşkilatlarının birgə ali məclisinin keçirilməsi barədə dövlətimizin başçısının təşəbbüsünü yüksək dəyərləndirən natiqlər, təmsil etdikləri təşkilatların da bu yaxınlarda yaradıldığını, məqsədlərinin Azərbaycan həqiqətlərini dünya ictimaiyyətinin diqqətinə çatdırmaq, xalqımızın qədim tarixini, zəngin mədəniyyətini təbliğ etmək olduğunu bildirmişlər.
Qeyd olunmuşdur ki, hər iki qurum Avropa ictimaiyyətini Azərbaycan haqqında zəruri informasiyalarla təmin etməyi, habelə Ermənistan-Azərbaycan, Dağlıq Qarabağ münaqişəsi ilə bağlı həqiqətləri Avropa ölkələrinə çatdırmağı qarşısına əsas məqsəd qoymuşdur. Bundan əlavə, mərkəzlər Azərbaycanda gedən sosial-iqtisadi inkişaf prosesləri, ölkəmizin son dövrlərdə əldə etdiyi nailiyyətlər barədə də Avropa ictimaiyyətini məlumatlandıracaq, Azərbaycanın Avratlantik strukturlarına inteqrasiya siyasətinə dəstək verəcəklər. Bu məqsədlə müxtəlif tədbirlər keçiriləcək, Azərbaycan icmalarına yaxından kömək göstəriləcəkdir.
Bildirilmişdir ki, mərkəzlərin fəaliyyətinin əsas istiqamətlərindən biri də ermənilərin “soyqırımı” iddiaları ilə bağlı elmi-praktik konfranslar təşkil etmək, bu iddiaların reallıqdan tamamilə uzaq olduğunu sübut edən elmi araşdırmaların nəticələri barədə dünya ictimaiyyətini məlumatlandırmaq olacaqdır. Mərkəzlərin nəzdində ayrı-ayrı sahələr üzrə fəaliyyət göstərəcək bölmələrin qurulması da nəzərdə tutulmuşdur.
Bu qurumlar qardaş ölkələrimiz arasında münasibətlərin inkişafına da töhfə verməyə çalışacaq, dostluq və əməkdaşlıq əlaqələrinin möhkəmlənməsinə xidmət edən tədbirlər keçirəcəkdir.
Qeyd olunmuşdur ki, gələn ilin fevralında Almaniya və Fransada Xocalı soyqırımı ilə bağlı keçiriləcək anım mərasimlərində, habelə Novruz bayramı şənliklərində türk və azərbaycanlılar birgə iştirak edəcəklər. Mayın sonunda isə Almaniyanın Mayns şəhər bələdiyyəsi sədrinin rəhbərliyi ilə nümayəndə heyəti Bakıya gələcəkdir.
Bölmənin digər xəbərləri
