Ümummilli liderimiz Prezident Heydər Əliyevin unudulmaz xatirəsi bir dəqiqəlik sükutla yad olunduqdan sonra baş prokuror Zakir Qaralov “Heydər Əliyev müstəqil Azərbaycan dövlətçiliyinin və ən yeni tariximizin yaradıcısıdır” mövzusunda məruzə etmişdir. Natiq demişdir ki, Azərbaycan tarixinin son 34 illik bir mərhələsi xalqımızın böyük oğlu Heydər Əliyevin adı ilə bağlıdır. Bir qərinəyə bərabər olan bu zaman kəsiyində Azərbaycan əsrə bərabər inkişaf yolu keçmişdir. Haqlı olaraq bu mərhələ Azərbaycan tarixinin Heydər Əliyev dövrü kimi səciyyələndirilir.

Ulu öndərimizin keçdiyi şərəfli ömür yolunun ayrı-ayrı mərhələləri barədə ətraflı məlumat verən baş prokuror demişdir ki, Azərbaycanın dövlət müstəqilliyinin bərpa edilməsinin tarixi 1991-ci il oktyabrın 18-dən başlansa da, suverenliyimizin siyasi, sosial-iqtisadi əsasları ümummilli liderimiz Heydər Əliyevin respublikamıza rəhbərlik etdiyi XX əsrin 70-80-ci illərində yaradılmışdır. Təsadüfi deyildir ki, Azərbaycanın intibah dövrü kimi dəyərləndirilən həmin illərdə respublikamızı ittifaqın xammal mənbəyi kimi saxlamağa çalışan keçmiş SSRİ-nin bütün maneə və qadağalarına baxmayaraq, Heydər Əliyev şəxsiyyətinin dahiyanə uzaqgörənliyi sayəsində milli iqtisadiyyatımızın sürətli tərəqqisi təmin edilmiş, respublikamızın sosial və mədəni həyatının inkişaf salnaməsinə parlaq səhifələr yazılmışdır. Məhz həmin dövrdə formalaşmış maddi və mənəvi sərvətlər potensialı sonradan müstəqilliyimizin reallaşması üçün əsas baza rolunu oynamışdır. İstər respublikamıza rəhbərlik etdiyi, istərsə də SSRİ kimi super dövlətin əsas vəzifələrindən birində çalışdığı illərdə ulu öndərimiz Azərbaycanın inkişafı üçün nə mümkün idisə hamısını etmişdir.

Məruzəçi vurğulamışdır ki, Heydər Əliyev harada, hansı şəraitdə, hansı vəzifədə çalışmasından asılı olmayaraq, həmişə öz xalqı ilə birlikdə olmuş, mahir bir sükançı kimi onu tarixin ən çətin sınaqlarından məharətlə çıxarmış, sarsılmaz zəmin üzərində müstəqil Azərbaycan dövlətini qurmuş, onu beynəlxalq aləmdə tanıtmış, ölkəmizi müasir dünyanın inkişaf magistralına istiqamətləndirmiş, məmləkətimizin mükəmməl inkişaf strategiyasını müəyyənləşdirmişdir.

Natiq bildirdi ki, bu strategiya Azərbaycanı regionun aparıcı dövlətinə, transmilli layihələrin həyata keçirilməsində həlledici söz və mövqe sahibinə çevirmişdir. “Əsrin müqaviləsi”, Bakı-Tbilisi-Ceyhan neft və Bakı-Ərzurum qaz kəmərləri, Böyük İpək yolu layihələri Heydər Əliyevin Azərbaycana beynəlxalq aləmdə böyük nüfuz qazandıran iqtisadi strategiyasının tarixi töhfələridir.

Ümummilli liderimizin xalqımız qarşısında ən möhtəşəm tarixi xidməti milli dövlətçilik ənənəsinin əsasını qoymasıdır. Bu siyasət demokratik, hüquqi və dünyəvi dövlət quruculuğu prinsipləri üzərində qurulmuşdur. Məhz bu siyasət zəminində müstəqil Azərbaycanın ilk milli Konstitusiyası qəbul edilmiş, çoxpartiyalılıq prinsipi əsasında demokratik, şəffaf prezident və parlament seçkiləri keçirilmiş, cəmiyyətdə pozulmaz fikir, söz və mətbuat azadlığı bərqərar edilmiş, mükəmməl qanunvericilik bazası yaradılmış, əsaslı hüquq islahatları aparılmışdır.

Baş prokuror xüsusi qeyd etmişdir ki, ölkəmizdə insan hüquq və azadlıqlarının hərtərəfli müdafiəsi, humanizm və sosial ədalət prinsiplərinin möhkəmləndirilməsi, hakimiyyətdə olduğu bütün dövrlərdə, xüsusən də 1993-cü ildən sonrakı mərhələdə Heydər Əliyevin dövlətçilik siyasətinin mahiyyətini təşkil edən əsas prinsiplər olmuşdur. Heydər Əliyevin təşəbbüsü ilə Şərqdə ilk dəfə məhz Azərbaycanda ölüm cəzası ləğv edilmiş, ölkəmiz insan hüquq və azadlıqlarına dair 130-a yaxın beynəlxalq konvensiyaya və sazişə qoşulmuş, respublikamız Avropa Şurasına tamhüquqlu üzv qəbul olunmuşdur. Natiq demişdir ki, hüquq mühafizə işçilərinə cinayətkarlığa qarşı həmişə barışmaz mövqe tutmağı tövsiyə edən ulu öndərimiz, eyni zamanda, humanizm prinsiplərinə əsaslanan siyasət yeritmişdir. 1995-ci ilin may ayında ölkəmizdə əfvetmə təsisatı bərqərar edilməklə, xalqımızın ümummilli liderinin imzaladığı əfv fərmanları və onun təşəbbüsü ilə qəbul edilmiş amnistiya aktları əsasında son səkkiz il ərzində 70 mindən artıq şəxs müxtəlif cəzalardan tam və ya qismən azad edilmişdir.

Respublikamızın prokurorluq orqanlarının fəaliyyəti ümummilli liderimiz Prezident Heydər Əliyevin daim diqqət mərkəzində olmuşdur. Ulu öndərimizin dövlətçiliyimizin əsas sütunlarından biri hesab etdiyi prokurorluq orqanlarına dövlət qayğısının nəticəsidir ki, Konstitusiyamızda prokurorluğun təşkili və fəaliyyət prinsiplərini, hüquqi statusunu müəyyənləşdirən normalar nəzərdə tutulmuş, “Prokurorluq haqqında”, “Prokurorluq orqanlarında qulluq keçmə haqqında” mütərəqqi qanunlar qəbul edilmişdir. Məhz Prezident Heydər Əliyevin diqqət və qayğısı sayəsində Azərbaycan prokurorluğu dövlətçiliyimizin və qanunun aliliyi prinsipinin reallaşması cinayətkarlığa qarşı mübarizənin gücləndirilməsi, insan hüquq və azadlıqlarının təmin olunması məqsədlərinə xidmət edən sivil bir quruma çevrilmişdir.

Xalqımız mayın 10-da ulu öndərimizin anadan olmasının 81-ci ildönümünü qeyd edəcəkdir. Bu şərəfli gündə ümummilli liderimiz çox təəssüf ki, cismən bizim aramızda olmayacaqdır. Ancaq müdrik Heydər Əliyevin zəngin dövlətçilik irsi, yenilməz siyasi kursu xalqımızın inkişaf yolunu daim işıqlandıracaqdır. Möhtərəm Heydər Əliyevin qurub-yaratdığı dövlətimizin sükanı etibarlı əllərdədir. Azərbaycan Prezidenti İlham Əliyev fəaliyyətinin ilk günündən həyata keçirdiyi dövlətçilik tədbirləri ilə sübut etmişdir ki, ölkəmiz ulu öndərimizin müəyyənləşdirdiyi yol ilə inamla irəliləyir və irəliləyəcəkdir. Natiq əminliklə bildirmişdir ki, Heydər Əliyevin zəngin dövlətçilik irsi, onun qurub-yaratdığı müstəqil Azərbaycan əbədi yaşayacaqdır.

Konfransda Azərbaycanda Atatürk mərkəzinin müdiri, Milli Məclisin deputatı, Milli Elmlər Akademiyasının müxbir üzvü Nizami Cəfərovun “Heydər Əliyev Azərbaycançılıq ideologiyasının yaradıcısıdır”, Milli Məclisin deputatı, xalq şairi Zəlimxan Yaqubun “Poeziyamızda Heydər Əliyev mövzusu” adlı çıxışları dinlənilmişdir. Natiqlər qeyd etmişlər ki, xalqımızın və dövlətimizin milli maraqlarına xidmət edən Azərbaycançılıq ideologiyasının nəzəri əsasları ümummilli liderimiz Heydər Əliyev tərəfindən qoyulmuşdur. Bu gün həmin ideologiyanın dərindən öyrənilməsi vacib məsələlərdən biridir. Bütün dünya azərbaycanlılarının bir araya gəlməsində misilsiz xidmətləri olan böyük öndərimizin arzularının gerçəkləşməsi üçün bu sahədə vahid konsepsiya yaradılmasına ehtiyac vardır.

Elmi-praktiki konfransın iştirakçıları və Azərbaycan Respublikası Baş Prokurorluğunun kollektivi adından xalqımızın ümummilli lideri Heydər Əliyevin anadan olmasının 81-ci ildönümü ilə əlaqədar dövlətimizin başçısı İlham Əliyevə müraciət qəbul olunmuşdur.