SİYASƏT
“Veçerni Murmansk” qəzetində Azərbaycan və həmvətənlərimiz haqqında məqalə dərc olunmuşdur
Bakı, 4 fevral (AZƏRTAC). Murmansk Şəhər Administrasiyasının təsisçisi olduğu “Veçerni Murmansk” qəzetində “Murmanskda hamı qardaş kimidir” sərlövhəli məqalə dərc edilmişdir.
Murmansk şəhərinin Azərbaycan diasporunun nümayəndəsi Əlihüseyn Şükürov AZƏRTAC-a bildirmişdir ki, məqalədə şəhər bələdiyyəsinin başçısı Aleksey Vellerin Ümumrusiya Azərbaycanlıları Konqresi ictimai təşkilatının nümayəndələri ilə görüşündən bəhs olunur. Azərbaycanlılardan ibarət nümayəndə heyəti Murmansk şəhəri və vilayəti ilə tanışlıq, həmvətənlərimizin şimalda nə ilə məşğul olduqlarını öyrənmək üçün Moskvadan gəlmişdir.
Məqalədə deyilir: “Qonaqlar “Dostluq festivalı” adlı milli mədəniyyətlər bayramında iştirak etmiş və belə qənaətə gəlmişlər ki, 100-dən çox xalqın nümayəndələrinin yaşadıqları bu regionda hamı qardaş kimidir”.
Məqalədə yerli bələdiyyə başçısının bu sözləri misal gətirilir: “Şəhərdə və vilayətdə heç bir millətlərarası münaqişə yoxdur. Biz başa düşürük ki, başqa dövlətlərdən bizə köçmüş insanlara diasporların dəstəyi gərəkdir. Sizin Murmansk vilayətindəki təşkilatınızın Afil Hüseynov kimi çox fəal rəhbəri vardır. O, həmişə bizimlə əlaqə saxlayır, suallar, ideyalar və təkliflərlə müraciət edir. Murmansk azərbaycanlıları ilə yaxşı əlaqələr yaradılmışdır”.