REGİONLAR
Yaponiyanın ölkəmizdəki səfiri Sumqayıt Kimya Sənaye Parkının fəaliyyəti barədə məlumatlandırılıb
Bakı, 14 oktyabr, AZƏRTAC
Yaponiyanın Azərbaycandakı səfiri Çuniçi Vada və səfirliyin əməkdaşları Sumqayıt Kimya Sənaye Parkında olublar.
İqtisadiyyat Nazirliyinin mətbuat xidmətindən AZƏRTAC-a bildirilib ki, səfirlik əməkdaşlarına sənaye parklarının fəaliyyətini əks etdirən videoçarx nümayiş etdirilib, ölkəmizdə yaradılan sənaye parkları, burada sahibkarlar üçün yaradılmış əlverişli şərait, tətbiq edilən güzəştlər barədə məlumat verilib.
Görüşdə, həmçinin Azərbaycan İnvestisiya Şirkətinin fəaliyyəti barədə təqdimat keçirilib.
Sonda Yaponiya səfirliyinin nümayəndə heyəti Sumqayıt Kimya Sənaye Parkının ərazisində görülmüş işlər, parkın rezidenti “Azertexnolayn” MMC-nin Polad Boru Zavodunda istehsal prosesi ilə tanış olub.
Qeyd edək ki, “Azertexnolayn” MMC-nin müəssisələrində bir çox qabaqcıl ölkələrin, o cümlədən Yaponiyanın texnologiyalarından istifadə edilir.