Yekaterinburqda 20 Yanvar - Ümumxalq Hüzn Günü ilə əlaqədar tədbir keçirilib
Yekaterinburq, 19 yanvar, AZƏRTAC
Azərbaycanın Rusiyanın Yekaterinburq şəhərindəki Baş konsulluğunda 20 Yanvar - Ümumxalq Hüzn Günü ilə əlaqədar tədbir keçirilib.
AZƏRTAC xəbər verir ki, tədbirdə Azərbaycan diasporunun nümayəndələri və Baş konsulluğun əməkdaşları iştirak ediblər.
Şəhidlərimizin xatirəsinin bir dəqiqəlik sükutla yad edilməsi və Dövlət himnlərinin səslənməsi ilə başlanan anım tədbirində 20 Yanvar hadisələrinə dair film nümayiş olunub.
Azərbaycanın Yekaterinburq şəhərindəki baş konsullu vəzifəsini icra edən Şöhrət Mustafayev tədbirdə çıxış edərək, ötən əsrin əvvəllərində olduğu kimi, 33-cü ildönümünü andığımız 1990-cı il 20 Yanvar hadisələrinin də Azərbaycan xalqının iradəsinin sarsılmazlığının, öz müqəddəratına sahib çıxa biləcək qüdrətdə olmasının təsdiqi olduğunu diqqətə çatdırıb. O, ən yeni tariximizə “Qara Yanvar” kimi yazılan 20 Yanvar hadisəsinin xalqımızın qəhrəmanlıq salnaməsinə çevrildiyini, müasir Azərbaycanın taleyində dönüm nöqtəsi olaraq, milli kimliyimizin formalaşmasında və dövlət müstəqilliyimizin bərpa olunmasında həlledici amil olduğunu qeyd edib.
Ş.Mustafayev bildirib ki, “Qanlı Yanvar” hadisəsinə ilk həqiqi siyasi qiymət Ümummilli Lider Heydər Əliyev tərəfindən verilib. Ulu Öndər faciədən dərhal sonra özünün və ailəsinin həyatını təhlükəyə ataraq, Azərbaycanın Moskvadakı Daimi nümayəndəliyində mətbuat konfransı keçirib, kommunist rejiminin Azərbaycanda törətdiyi qanlı aksiyanı qətiyyətlə pisləyib. Ümummilli Lider Heydər Əliyevin təşəbbüsü ilə Milli Məclisin 1994-cü ilin fevralında keçirilən xüsusi sessiyasında 1990-cı il yanvarın 20-də günahsız insanların qəddarcasına qətlə yetirilməsi hərbi təcavüz və cinayət kimi qiymətləndirilib, həmin ilin mart ayında “1990-cı il yanvarın 20-də Bakıda törədilmiş faciəli hadisələr haqqında” qərar qəbul edilib, 20 Yanvar - Ümumxalq Hüzn Günü elan edilib.
Ş.Mustafayev tarixin bütün dövrlərində olduğu kimi, keçən 33 ildə də baş verən bütün tarixi, siyasi və hüquqi ədalətsizliklərə baxmayaraq, Azərbaycan xalqının mətin xalq kimi daima öz ayaqları üzərində durmağı bacardığını, Müzəffər Ali Baş komandan İlham Əliyevin rəhbərliyi altında rəşadətli Azərbaycan Ordusunun 44 günlük Vətən müharibəsi nəticəsində ölkəmizin ərazi bütövlüyünü təmin etdiyini və hazırda ölkəmizin dünya birliyinin layiqli, etibarlı və məsuliyyətli üzvünə çevrildiyini tədbir iştirakçılarının diqqətinə çatdırıb.
Daha sonra diaspor fəalı Qabil Məmmədov və Rusiya Azərbaycanlı Gənclər Birliyinin Sverdlovsk vilayətindəki nümayəndəliyi adından Tural Eyyubov çıxış edərək, 20 Yanvar faciəsinin xalqımızın tarixində silinməz izlər buraxdığını qeyd edib, Ali Baş Komandan İlham Əliyevin rəhbərliyi ilə 44 günlük Vətən müharibəsində xalqımızın və şanlı Ordumuzun rəşadətindən bəhs edərək, ərazi bütövlüyümüzün bərpa olunması ilə şəhidlərimizin qanının yerdə qalmadığını vurğulayıblar. Eyni zamanda, xaricdə yaşayan azərbaycanlıların daima dövlətimizin yanında olduğu qeyd olunub.
Anım tədbirində “Qanlı Yanvar” faciəsini əks etdirən fotoşəkillər nümayiş etdirilib.
Fəridə Abdullayeva
AZƏRTAC-ın xüsusi müxbiri
Yekaterinburq
Bölmənin digər xəbərləri
