Şuşa, 1 sentyabr, T.Ağaməmmədov, AZƏRTAC

“Vətəndaş Cəmiyyəti Uğrunda” Seçki Müşahidə Koalisiyasının müşahidəçiləri Şuşa, Xankəndi və Xocalıda parlament seçkilərinin gedişini izləyiblər.

Xocalı şəhərində 118 saylı Ağdam-Xocalı seçki dairəsinin 73 saylı məntəqəsində seçki prosesini izləyən “Vətəndaş Cəmiyyəti Uğrunda” Seçki Müşahidə Koalisiyasının müşahidəçisi Nadir İsmayılov AZƏRTAC-ın bölgə müxbirinə müsahibəsində deyib: “Biz bu gün tarixi bir gün yaşayırıq. Azərbaycan müstəqillik əldə etdikdən sonra ilk dəfədir ki, bütöv Azərbaycanda parlament seçkiləri keçirilir. Xoşbəxtik ki, bu seçkiləri azad Qarabağımızda – Şuşada, Xankəndidə, Xocalıda müşahidə edirik. Seçicilərin əhvali-ruhiyyəsi çox yüksəkdir. Seçki məntəqələrində səsvermə üçün lazım olan şərait var. İstər müşahidəçilərin fəaliyyəti, istərsə də seçicilərin rahat şəkildə səs verməsi üçün hər cür şərait yaradılıb. Əminəm ki, bu seçkilər Azərbaycanın demokratiya tarixində növbəti bir uğuru olacaq. Bizə bu xoşbəxtliyi yaşatdıqları üçün başda Ali Baş Komandan olmaqla, Azərbaycan Ordusuna minnətdarlığımı bildirirəm”.

124 saylı Şuşa-Ağdam-Xocavənd seçki dairəsinin Şuşa şəhərində yaradılmış 46 saylı seçki məntəqəsində seçki prosesini izləyən digər müşahidəçi Fuad Salahov isə deyib: “Bu gün çox qürurluyam. Doğma şəhərim Şuşada parlament seçkiləri keçirilir və bu seçkidə müşahidəçi kimi iştirak etməkdən məmnunam. Seçkilər yüksək səviyyədə təşkil olunub. Səsvermə başlayandan məntəqədəyəm. Seçki prosesi şəffaf, demokratik keçir. Seçicilər məntəqəyə gələrək konstitusion hüquqlarından istifadə edir, istədikləri namizədə səs verirlər”.

Qeyd edək ki, ilk dəfədir Azərbaycanın bütün suveren ərazilərində Milli Məclisə seçkilər keçirilir. Növbədənkənar seçkilər 6478 seçki məntəqəsində təşkil olunur. Onlardan 6343-ü daimi, 135-i isə müvəqqətidir.

Budəfəki seçkilərdə 125 mandat uğrunda 990 namizəd mübarizə aparır. Namizədliyi qeydə alınan 305 nəfər 25 siyasi partiyanın nümayəndəsidir.

Parlament seçkilərində 6 milyon 421 min 960 vətəndaş səsvermə hüququndan istifadə edə biləcək. İşğaldan azad olunmuş ərazilərdə səsvermə hüququna malik 42 mindən artıq seçicinin konstitusion hüquqlarını reallaşdırmaları üçün 54 seçki məntəqəsi yaradılıb.

Seçki günü 18 yaşı tamam olan seçicilərin sayı 374, Milli Məclisə seçkilərdə səsvermədə ilk dəfə iştirak edəcək seçicilərin sayı isə 51 min 141 nəfərdir.

Seçkiləri izləmək üçün 51 beynəlxalq qurum və 69 ölkədən olmaqla, 598 beynəlxalq müşahidəçi akkreditasiyadan keçib. Yerli müşahidəçi kimi isə 112 min 749 nəfər qeydə alınıb.

Ölkə ərazisində 1000 seçki məntəqəsində veb-kameralar quraşdırılıb.

Səhər 08:00-da başlayan səsvermə saat 19:00-da başa çatacaq.