SİYASƏT
ZƏRƏFŞAN ŞƏHƏRİNDƏ “OCAQ” AZƏRBAYCAN MƏDƏNİYYƏT MƏRKƏZİNİN TƏQDİMATI KEÇİRİLMİŞDİR
AZƏRTAC-ın xüsusi müxbiri xəbər verir ki, Özbəkistanın Zərəfşan şəhərində Nəvai vilayəti üzrə “Ocaq” Azərbaycan Mədəniyyət Mərkəzinin təqdimatı keçirilmişdir.
Mərasimdə Daşkənddəki Azərbaycan Mədəniyyət Mərkəzləri Assosiasiyası idarə heyətinin üzvləri, Nəvai, Zərəfşan, Uçkuduk şəhərlərində və ətraf qəsəbələrdə yaşayan 300-dən artıq soydaşımız iştirak etmişdir.
“Ocaq” Mədəniyyət Mərkəzinin sədri Sevil Balayeva mərkəzin vəzifələrindən danışmış, iştirakçıları Azərbaycanın Dövlət müstəqilliyi günü münasibətilə təbrik etmişdir. O demişdir: “Oktyabrın 15-də Azərbaycanda prezident seçkiləri keçirilmiş, İlham Əliyev yenidən dövlət başçısı seçilmişdir. Televiziya kanalları və internet saytlarından aldığımız məlumata görə, seçkilər azad və demokratik keçmişdir. Bu, Özbəkistanda yaşayan soydaşlarımızı da sevindirir.”
Assosiasiyanın sədri Akif Ağatalıbov iki ölkə arasında əlaqələrin dərinləşməsindən danışmış, bu baxımdan Özbəkistan Prezidenti İslam Kərimovun sentyabr ayında Azərbaycana səfərinin əhəmiyyətini vurğulamışdır. O, “Ocaq” Mədəniyyət Mərkəzinə ulu öndər Heydər Əliyevin və Azərbaycan Prezidenti İlham Əliyevin həyatı və fəaliyyəti, tariximizlə bağlı kitablar, habelə televizor hədiyyə etmişdir.
Zərəfşan şəhərinin icra başçısı Adxam Umarov əmin olduğunu bildirmişdir ki, yeni mərkəz vilayətdə Azərbaycan ədəbiyyatı, mədəniyyəti və incəsənətinin təbliğatçısına çevriləcəkdir.