Fernandu Santuş: İslandiya və Ukrayna yığmaları ilə oyunlarda uğurlu nəticələr qazanmaq istəyirik VİDEO
Bakı, 29 avqust, AZƏRTAC
Əvvəlcə "Qarabağ"ı Çempionlar Liqasının əsas mərhələsinə vəsiqə qazanması münasibətilə təbrik edirəm. Bu uğur Azərbaycan və klub üçün vacib nəticədir. Hər kəs bu ölkədən danışacaq.
AZƏRTAC xəbər verir ki, bu sözləri Azərbaycan milli komandasının baş məşqçisi Fernandu Santuş dünya çempionatının seçmə mərhələsində İslandiya və Ukrayna yığmaları ilə keçiriləcək oyunlardan öncə təşkil olunmuş mətbuat konfransında deyib.
O, Ağdam klubunun Liqa mərhələsindəki şanslarını dəyərləndirib: "Asan olmayacaq. "Qarabağ" layiqli şəkildə əsas mərhələyə vəsiqə qazandı. Əminəm ki, onlar qarşıdakı oyunlarda da gözəl çıxış edəcəklər. Lakin neçə xal yığacaqları barədə nəsə deyə bilmərəm".
Mətbuat konfransında yığmanın heyətini açıqlayan portuqaliyalı mütəxəssis bildirib ki, milliyə dəvət alan futbolçular daimi olaraq klublarında əsas heyətdə çıxış etməlidirlər: "Əlimizdə olan oyunçularla uğur qazanmaq istəyirik. Onların davamlı şəkildə oynaması mənim əsas məqsədimdir. Bədavi Hüseynov son vaxtlar "Qarabağ"da oynamadığı üçün toplanışa dəvət almadı. Onun xətrini çox istəyirəm. Gələcəkdə yenidən yığmada görə bilərik. Vüsal İsgəndərli və Mehdi Cənnətov isə sənədlərində problem olduğu üçün milliyə dəvət almayıblar”.
Baş məşqçi qarşıdakı iki oyunda uğurlu nəticələr əldə etmək istədiklərini söyləyib: "Son toplanışdan sonra gördüm ki, oyunçular istəklidirlər. Eyni səviyyədə davam edəcəklərinə inanıram. Bütün Azərbaycan xalqı bizdən qələbə gözləyir. Buna inanıram".
F. Santuş İslandiya yığmasının komplektləşmiş komanda olduğunu vurğulayıb: "Çox təcrübəli və keyfiyyətli futbolçuları var. Müdafiədən yaxşı hücumlar qururlar. Topsuz olanda isə daha aqressiv olurlar. Köməkçilərimlə birlikdə rəqibin bir neçə matçına baxmışıq. Güclü və zəif nöqtələrini bilirik. Meydanda 4-3-2-1 taktikası ilə çıxış edirlər. Ukraynaya gəlincə, güclü komandadır. Bizim üzərimizə düşən iş hər iki rəqibi yaxşı analiz edib, uğurlu nəticə qazanmaqdır".
Mütəxəssis legioner limitinin ləğvi haqqında fikir bildirmək istəməyib: "Bu, mənə aid olan məsələ deyil".
Qeyd edək ki, Azərbaycan millisi sentyabrın 5-də səfərdə İslandiya, 9-da isə evdə Ukrayna ilə qarşılaşacaq.
Bölmənin digər xəbərləri
