“Ya bu bayrağı Qarabağa sancacağıq, ya da ona bükülərək qayıdacağıq” VİDEO
Naxçıvan, 19 sentyabr, AZƏRTAC
Müzəffər Ordumuzun 2023-cü il sentyabrın 19-20-də həyata keçirdiyi antiterror əməliyyatından 2 il ötür. Həmin əməliyyat zamanı Vətənimizin ərazi bütövlüyü və suverenliyi uğrunda gedən döyüşlərdə Naxçıvandan olan 10 hərbçi də böyük şücaət və qəhrəmanlıq nümunəsi göstərərək şəhidlik zirvəsinə ucalıb.
AZƏRTAC-ın bölgə müxbiri xəbər verir ki, həmin şəhidlərdən biri 1997-ci il sentyabrın 26-da Şərur rayonunun Yengicə kəndində dünyaya göz açan Elçin İbrahimlidir. Elçin elə məktəbdə oxuduğu dövrdə davranışı, dərslərinə məsuliyyətli yanaşması ilə müəllimlərinin hörmətini qazanmışdı. Qəlbindəki Vətən sevgisi və dayısının da hərbçi olması onun bu peşəni seçməsinə vəsilə olub. Həm orta, həm də ali hərbi təhsilə yiyələnib. 2019-cu ildə leytenant hərbi rütbəsi ilə Tərtər rayonunda hərbi hissədə mühəndis-istehkam taqımının komandiri vəzifəsində xidmətə başlayır.
Elçin 2020-ci ilin sentyabr ayında məzuniyyət götürərək Naxçıvana gəlir. Sentyabrın 27-də müharibənin başladığını eşidən kimi dərhal xidmət etdiyi Tərtər rayonuna qayıtmaq istəyir. Lakin yollar bağlı olduğu üçün gedə bilmir. “Mənim yoldaşlarım döyüşür, mən burada dayana bilmərəm”,- deyib səfərbərlik xidmətinə müraciət edir və onu döyüş bölgəsinə göndərmələrini istəyir. Oktyabrın 6-da bir qrup hərbçi ilə döyüş bölgəsinə yola salınır. Elçin bundan bir gün əvvəl özü ilə Dövlət Bayrağımızı götürmüşdü. Anası ilə sağollaşarkən “Ya bu bayrağı Qarabağa sancacağıq, ya da ona bükülərək qayıdacağıq”, - deyir. Və belə də olur. Qarabağa üçrəngli Bayrağımızı Zəfər nidaları ilə sancıb geri dönən igidlərimiz sırasında Elçin İbrahimli də yer alır.
Vətən müharibəsində Suqovuşanın azad olunmasında böyük şücaət və qəhrəmanlıq göstərən Elçin 2023-cü ilin sentyabr ayında həyata keçirilən antiterror əməliyyatında Ağdam-Ağdərə istiqamətində bir neçə hərbçi ilə düşmənin postunu darmadağın edərək Ağdərənin yüksəkliyinə ilk qalxanlardan olur. Verilən tapşırığı qəhrəmancasına yerinə yetirir, lakin son anda düşmənin zirehli texnikadan açdığı atəş nəticəsində şəhidlik zirvəsinə ucalır… O, sentyabrın 21-də doğma torpağı Naxçıvana qayıdır. Üçrəngli Bayrağı ilə birlikdə...
Babası Fəxrəddin İbrahimov deyir ki, fikirləşəndə onun uşaqlığı, məktəb illəri, gəncliyi kino lenti kimi gözümün önündən gəlib keçir, xatirələr dil açıb danışır: “Elə uşaqlıqdan vətənpərvərlik, Vətənə xidmət Elçinin qəlbinə, ruhuna hopmuşdu. Dayısı, yəni oğlum Zaur da hərbçidir. Zaur məzuniyyətə gələndə onun hərbi geyimlərini geyinir, hərbi papağını başına qoyurdu. “Baba mən də dayım kimi komandir olacağam. Vətənimi göz bəbəyi kimi qoruyacağam”- deyirdi. Qorudu da”.
Fəxrəddin baba Elçin haqqında son xatirəsini danışanda göz yaşlarını saxlaya bilmir. Bildirir ki, 2023-cü il sentyabrın 19-da Elçin onun telefonuna mesaj göndərib: “Babam mənim, mən səni çox sevirəm, özündən muğayat ol. Sən mənə həm baba, həm də ata olmusan”. Bu sözlər mənə çox təsir etmişdi... Həmin gün axşam saat 8-də şəhid olduğu xəbəri gəldi”.
Elçin İbrahimlinin anası Aynurə İbrahimova ilə söhbət edirik. Deyir ki, uşaqlıqdan oğlunu hərbçi kimi böyütmək istəyib. “Körpəliyindən Elçini hərbçi ruhunda tərbiyə etməyə, hərbi forma geyindirməyə çalışırdım. Başına hərbi papaqlar qoyurdum. Elçin balaca olanda dayısı ali hərbi məktəbdə kursant idi. Həmişə məzuniyyətə gələndə oyuncaqlar alıb gətirərdi. Elçin ancaq əsgər oyuncaqları ilə oynayardı. Orta məktəbdə də hərbi-vətənpərvərlik mövzusuna həsr edilən tədbirlərdə iştirak etməkdən ötrü can atırdı”, - deyir şəhid anası.
Aynur xanım söhbətinə davam edir: “44 günlük Vətən müharibəsindən balam Qələbə sevinci ilə qayıtdı. “Qisas” əməliyyatından da sağ qayıtdı. Ancaq antiteror əməliyyatında şəhidlik zirvəsinə yüksəldi. Biz ana-bala yox, həmişə dost olmuşuq. Nə dərdi-səri olsa, birinci mənimlə bölüşərdi. Deyirdi sənlə danışanda, məsləhətləşəndə rahatlıq tapıram. İndi təsəllim odur ki, Elçin xalqımızın 30 illik Vətən həsrətinə son qoyan igidlərimiz arasındadır. Hər bir azərbaycanlı, qohum-əqrəba, dost-tanış, müəllimləri, sinif yoldaşları onunla fəxr edir”.
Elçin İbrahimli 2021-ci ildə ailə həyatı qurmuşdu. Sağ ikən ən böyük arzularından biri də həyat yoldaşı Ceyran xanımı həkim görmək idi. Həyat yoldaşının biologiya ixtisas üzrə ali təhsili olsa da, məhz şəhidin arzusunu yerinə yetirmək üçün əzmlə hazırlaşıb. Ötən il ali təhsil müəssisələrinə qəbul imtahanında uğur qazanaraq Naxçıvan Dövlət Universitetinin Tibb fakültəsinə daxil olub.
Qeyd edək ki, Prezident İlham Əliyevin imzaladığı müvafiq sərəncamlarla həm Vətən müharibəsi, həm də ondan sonrakı əməliyyatlarda şücaət və qəhrəmanlıq nümunəsi göstərdiyi üçün Elçin İbrahimli 3-cü dərəcəli “Vətənə xidmətə görə” ordeni və “Suqovuşanın azad olmasına görə”, “Vətən müharibəsi iştirakçısı”, “Vətən uğrunda”, “Cəsur döyüşçü” medalları ilə təltif olunub.
Bölmənin digər xəbərləri
