Naxçıvan, 21 yanvar, AZƏRTAC

Naxçıvan Karate-do Federasiyasının hesabat-seçki yığıncağı keçirilib. Tədbirdə Naxçıvan Gənclər və İdman Nazirliyinin əməkdaşları, federasiya nümayəndələri, məşqçi və hakimlər iştirak ediblər.

Muxtar respublikanın Gənclər və İdman Nazirliyinin mətbuat xidmətindən AZƏRTAC-ın Naxçıvan bürosuna bildirilib ki, gənclər və idman naziri Ramil Hacı çıxışında Ali Məclis Sədrinin rəhbərliyi altında muxtar respublikada idman və idmançılara dövlət qayğısının ən yüksək səviyyədə olduğunu vurğulayıb. Bildirib ki, nazirlik idmanın inkişafı və təbliğinə nail olmaq üçün muxtar respublikanın bütün idman federasiyaları ilə qarşılıqlı fəaliyyət göstərir. Ötən il ərzində nazirlik tərəfindən bədən tərbiyəsi və idman sahəsi üzrə 189 tədbir keçirilib, eyni zamanda, idmançılarımızın ölkə və dünya səviyyəli yarışlarda qazandığı 27 qızıl, 32 gümüş və 23 bürünc medal Naxçıvan idmanı tarixində medalların əyarına görə qazanılan ən yüksək göstəricidir. Bütün bunlar muxtar respublikada uğurla icra olunan dövlət siyasətinin bariz nümunəsidir.

Ramil Hacı vurğulayıb ki, muxtar respublika idmanında davamlı inkişaf, qazanılan uğur və nailiyyətlərə baxmayaraq qarşımızda mühüm vəzifələr dayanır. İdman federasiyaları və aidiyyəti qurumlarla birgə “2020-2025-ci illər üçün Naxçıvan Muxtar Respublikasında idmanın inkişafına dair Dövlət Proqramı”nın icrası istiqamətində işlər davam etdirilməlidir. Gənc nəslin, əhalinin, xüsusən də sağlamlıq imkanları məhdud şəxslərin idmana cəlbi, bu sahədə kütləviliyin artırılması, idmanın müxtəlif növləri üzrə muxtar respublika, ölkə və beynəlxalq səviyyəli yarışların təşkili, idmançılarımızın irimiqyaslı yarışlarda iştirakı təmin olunmalıdır. Xarici əməkdaşlıq əlaqələri artırılmalı, digər ölkələrdə uğurla sınaqdan keçmiş təcrübələr tətbiq olunmalı, təcrübəli mütəxəssislərin Naxçıvana dəvət olunması davam etdirilməlidir.

Karate-do Federasiyasının fəaliyyəti haqqında danışan nazir deyib ki, 2002-ci ildə yaradılan federasiyanın Culfa rayonu istisna olmaqla bütün şəhər və rayonlarda bölmə və qrupları fəaliyyət göstərir. Hazırda 22 qrupda 575 idmançı karate ilə məşğul olur. Karateçilərin ölkə, beynəlxalq, Avropa və dünya səviyyəli yarışlarda iştirakı təmin edilib, nəticələrə əsasən, karateçilərimiz Azərbaycan birinciliklərində 20, beynəlxalq turnirlərdə 8, Avropa çempionatlarında 1, dünya çempionatlarında 7 medal olmaqla, ümumilikdə 36 medal qazanıblar.

Naxçıvan Karate-do Federasiyasının sədr müavini Nəriman Quliyev federasiyanın ötənilki fəaliyyəti barədə hesabat xarakterli məlumatı diqqətə çatdırıb.

Hesabat-seçki yığıncağında Naxçıvan Muxtar Respublikası Dövlət Təhlükəsizliyi Xidmətinin rəisi Nurlan Pənahov Naxçıvan Karate-do Federasiyasının sədri vəzifəsinə seçilib.

Gənclər və idman naziri Ramil Hacı nazirliklə federasiyanın birgə və məqsədyönlü fəaliyyətinin nəticəsi olaraq dövlət idman siyasəti çərçivəsində qarşıya qoyulan tələb və tapşırıqların yerinə yetirilməsi, eyni zamanda, karatenin inkişafı yolunda yeni nailiyyətlərin əldə olunacağına inamını ifadə edib, federasiya sədrini təbrik edib, fəaliyyətində uğurlar arzulayıb.

Nurlan Pənahov göstərilən yüksək etimada görə Ali Məclis Sədrinə minnətdarlığını bildirib. Qeyd edib ki, muxtar respublikamızda bədən tərbiyəsi və idmanın inkişafı istiqamətində həyata keçirilən məqsədyönlü dövlət siyasəti idmanın bütün növləri kimi, karatenin də inkişafında özünü göstərir. “Karate-do Federasiyasının kollektivi bundan sonra da qarşıya qoyulan vəzifə və tapşırıqların həyata keçirilməsində əzmlə çalışacaq, istedadlı idmançıların yetişdirilməsində səy və bacarığını əsirgəməyəcəkdir”, - deyən federasiya sədri görüləcək işlərin icrası yolunda məşqçi və idmançılara uğurlar arzulayıb.

Çıxışlardan sonra gündəlikdə duran məsələlərlə bağlı hazırlanan qərar layihəsi təsdiq olunub.