ABŞ AZƏRBAYCANLILARI ŞƏBƏKƏSİNİN KONFRANSI DİASPOR QURUCULUĞUNUN PERSPEKTİVLƏRİNİ MÜZAKİRƏ ETMİŞDİR
AZƏRTAC-ın xüsusi müxbiri xəbər verir ki, Vaşinqtonda ABŞ Azərbaycanlıları Şəbəkəsinin Xaricİ Ölkələrdə Yaşayan Azərbaycanlılarla İş üzrə Dövlət Komitəsi ilə birgə təşkil etdiyi “ABŞ-Azərbaycan strateji tərəfdaşlıq əlaqələrinin inkişafında enerji təhlükəsizliyi və diasporun rolu” mövzusunda ikigünlük konfrans başa çatmışdır.
Nüfuzlu Corc Vaşinqton Universitetində keçirilən konfransda diasporumuzun 300-ə yaxın nümayəndəsi iştirak etmişdir. ABŞ-ın yarım milyonluq azərbaycanlı icmasının səsinə çevrilən ABŞ Azərbaycanlıları Şəbəkəsi yarandığı bir ildən az müddətdə sıralarında Amerikanın 33 ştatından 5 min fəal üzvü birləşdirir və ABŞ-da fəaliyyət göstərən 50-yə yaxın icma təşkilatlarının səylərini əlaqələndirir. Şəbəkə üzvləri indiyədək Konqresə, Ağ evə və yerli orqanlara azərbaycanlı və digər türkdilli icmaları narahat edən məsələlərlə bağlı 60 minə yaxın məktub göndərmişlər. Təsadüfi deyil ki, Şəbəkənin indiki konfransına Virciniya ştatının təmsilçiləri - konqresmen Robert Uitman və senator Con Uorner, Merilend ştatının təmsilçisi Kris Van Hollen və Kolumbiya dairəsinin nümayəndəsi Eleanor Holmz Norton təbrik göndərmişdilər. Konfransın işinə uğurlar arzulayan Amerika qanunvericiləri ABŞ-Azərbaycan strateji tərəfdaşlıq münasibətlərinin inkişafında rolu və dəstəyinə görə ölkənin azərbaycanlı icmasına minnətdarlıqlarını bildirmiş və enerji təhlükəsizliyinin ABŞ-ın gündəliyində duran vacib məsələ olduğunu vurğulamışlar.
Konfransın ilk günü müzakirələr ABŞ-Azərbaycan strateji tərəfdaşlığının genişləndirilməsinə dair təhlil və tövsiyələr, iki ölkə arasında ticarət və biznes təmaslarının genişləndirilməsi, Xəzər hövzəsinin enerji ehtiyatlarının ikitərəfli və çoxtərəfli münasibətlərə təsiri və türkdilli icmanın Amerikanın siyasi həyatında artan rolu ətrafında aparılmışdır. Müzakirələrdə Konqresin sabiq üzvləri Robert Livinqston, Qreq Laflin, Azərbaycanın ABŞ-dakı səfiri Yaşar Əliyev, ARDNŞ-in vitse-prezidenti Elşad Nəsirov, ABŞ Azərbaycanlıları Şəbəkəsinin direktoru Adil Bağırov, azərbaycanşünas professor Tadeuş Svyataxovski də çıxış etmişlər. Nüfuzlu “Heritec” Fondunun keçmiş sovet respublikaları üzrə baş tədqiqatçısı Ariel Koen çıxışında demişdir ki, ABŞ-da qarşıdan gələn prezident seçkilərində hansı siyasi partiyanın qalib gəlməsindən asılı olmayaraq, Ağ ev bölgədə maraqlarının müdafiəsi naminə Azərbaycan kimi müttəfiqləri ilə strateji tərəfdaşlıq əlaqələrini davam etdirəcəkdir. Ata Corc Buşun hakimiyyəti zamanı Ağ ev aparatının başçısı olan Con Sununu isə vurğulamışdır ki, Xəzər hövzəsinin neft yataqları olmadan belə, Azərbaycan əhəmiyyətli geostrateji yerləşməsinə görə ABŞ üçün maraqlı tərəfdaşdır.
Konfransın ikinci günündə Amerikanın azərbaycanlı və digər türkdilli icmalarının Konqreslə işinin düzgün qurulması, başqa diaspor təşkilatları ilə əlaqələrin genişləndirilməsi zərurəti, diapsorumuzun keçdiyi inkişaf yolu və perspektivləri, daha mütəşəkkil fəaliyyəti, eləcə də noyabrdakı seçkilər ərəfəsində türkdilli seçicilərin səfərbər olaraq eyni mövqedən çıxış etməsi mövzularında söhbət getmişdir. Xarici Ölkələrdə Yaşayan Azərbaycanlılarla İş üzrə Dövlət Komitəsi sədrinin birinci müavini Valeh Hacıyev, Milli Məclisin deputatı Asim Mollazadə, ölkəmizin BMT yanında daimi nümayəndəsi Aqşin Mehdiyev, Los-Anceles şəhərindəki Baş konsul Elin Süleymanov, Meksikadakı diplomatik nümayəndəliyimizin müvəqqəti işlər vəkili İlqar Muxtarov Amerikadakı azərbaycanlı icmasının Vətənlə sıx əlaqələr qurmasının əhəmiyyətindən, ölkəmizdə son illərdə gedən ictimai-siyasi proseslərdən, Ermənistan-Azərbaycan, Dağlıq Qarabağ münaqişəsinin həlli məsələsində Azərbaycanın beynəlxlaq hüquq normaları və prinsiplərinə əsaslanan mövqeyi barədə danışmışlar. Şəbəkə üzvləri Azərbaycan və türk diaspor təşkilatlarının gündəliyində duran prioritet məsələlər, o cümlədən Azadlığa Dəstək Aktına 907-ci düzəlişin tamamilə aradan qaldırılması, Dağlıq Qarabağ münaqişəsinin həllində Azərbaycanın mövqeyinə ABŞ-ın geniş dəstəyini qazanmaq üzrə səyləri gücləndirməyi, Konqreslə təmasları artırmağı zəruri saymışlar.
Müzakirələrdə çıxış edən AZƏRTAC-ın ABŞ-dakı xüsusi müxbiri Şəfəq Akifqızı agentliyin diasporun fəaliyyətinin işıqlandırılmasına geniş yer verdiyini xatırlatmışdır. O bildirmişdir ki, ABŞ-dakı müxbir postu təsis olunandan bəri AZƏRTAC Amerikadakı soydaşlarımızla Azərbaycan arasında etibarlı ünsiyyət vasitəsinə çevrilmiş, onların sözünü dünyada yaşayan azərbaycanlılara çatdırmışdır.
Konfrans zamanı ABŞ Azərbaycanlıları Şəbəkəsi diaspor quruculuğunda göstərdiyi xidmətlərə görə qurumun “Liderlik” mükafatını təqdim etmişdir. Mükafata ABŞ-ın Kolumbiya Universitetinin professoru, azərbaycanşünas tarixçi Tadeuş Svyatoxovski və Respublikaçılar Partiyasının seçkiqabağı qurultayındakı ilk Azərbaycan mənşəli nümayəndə Con Vəfai layiq görülmüşlər.
Konfrans Vaşinqtonun məşhur Kennedi mərkəzində Azərbaycan incəsənət ustalarının iştirakı ilə verilən konsertlə başa çatmışdır. Konsert proqramında Azərbaycanın klassik və folklor musiqi nümunələri təqdim olunmuşdur. İsmayil Hacıyevin rəhbərliyi altında Kanadanın İpək Yolu kamera orkestri muğam musiqisinin beynəlxalq aləmdə təbliğatında böyük xidmətləri olan Azərbaycanın birinci xanımı Mehriban Əliyevaya həsr edilmiş “Dünyanın qızıl gülü” əsərini də ifa etmişdir.
######
Bölmənin digər xəbərləri
