ABŞ-DAKI AZƏRBAYCAN İCMASI TƏZƏ İLƏ YENİ PLANLARLA QƏDƏM QOYUR
Bu il Amerikanın Azərbaycan Cəmiyyəti ABŞ-da yaranan ilk diaspor təşkilatımız kimi 50 illik yubileyini qeyd edəcəkdir. Cəmiyyətdən alınan məlumata görə, may ayında təşkilat bu münasibətlə Nyu-Yorkun mərkəzi salonlarının birində böyük tədbir keçirməyi planlaşdırır. Cəmiyyətin prezidenti Tomris Azərinin sözlərinə görə, tədbirdə dünyanın hər yerindən gələn qonaqlarla yanaşı, ABŞ rəsmiləri və Konqres üzvlərinin iştirakı da gözlənilir. O demişdir: “Hətta Azərbaycan müstəqil olmayan illərdə də AAC çalışırdı ki, Azərbaycan mənşəli amerikalılar Vətənin məğrur tarixi və mədəniyyətini öyrənərək böyüsünlər. Hazırda cəmiyyət üzvləri Azərbaycan mənşəli amerikalıların ikinci və üçüncü nəslini təmsil edirlər. Keçirəcəyimiz tədbir Konqresdə rəsmi olaraq tanınacaq və bu münasibətlə bir çox binaların üstündə Azərbaycan bayrağı dalğalanacaqdır”.
Virciniya ştatında fəaliyyət göstərən “Ocaq” Azərbaycan Mədəniyyət Assosiasiyası da təzə ili yeni ruhla başlayıbdır. Təşkilat hər ayın ilk şənbə gününü “Azərbaycan axşamı” kimi qeyd edərək, mühazirələr, ədəbi-bədii axşamlar vasitəsilə milli-mənəvi dəyərlərimizi soydaşlarımız arasında təbliğ etmək niyyətindədir. Yanvarın 6-da Şantili şəhərində belə axşamlardan birincisini keçirən həmvətənlərimiz onu görkəmli şair Səməd Vurğunun 100 illik yubileyinə həsr etmişdilər. Tədbirdə şairin həyat və yaradıcılığından söhbət açılmış, onun əsərlərindən parçalar, şeirlərinə bəstələnmiş mahnılar ifa olunmuşdur. Assosiasiya gələcəkdə bu kimi tədbirlərə ABŞ-da fəaliyyət göstərən azərbaycanlı alimləri, incəsənət xadimlərini cəlb etməyi planlaşdırır.
Hyuston-Bakı Qardaşlaşmış Şəhərlər Assosiasiyası 2006-cı ildəki fəaliyyətinə dair yaydığı hesabatda ötən il Texas ştatında həyata keçirilən layihələri sadalamaqla yanaşı, builki planlarını da açıqlamışdır. Assosiasiya üzvləri 2006-cı ildə uğurla həyata keçirdikləri “Çanta layihəsini” də davam etdirəcəklər. Bu layihə “çantadan” çıxan milli kostyumlarımız, dövlət atributlarımız, Bakının emblemi kimi maraqlı əyani vasitələrlə Hyuston məktəblilərini Azərbaycan mədəniyyəti və ənənələri ilə tanış edir.
Yeni yaradılmış “Hyuston Azərbaycanlıları” təşkilatı isə Azərbaycanı ABŞ-da tanıtmaq üçün bir sıra maraqlı tədbirlər (Azərbaycan bədii filmlərinin nümayişi, mütəmadi keçiriləcək Azərbaycan mətbəxi saatları, “Hyuston Beynəlxalq Festivalında” iştirak və s.) nəzərdə tutublar. Texasdakı həmvətənlərimiz builki tədbirləri yanvar ayında keçirəcəkləri Azərbaycan incəsənət sərgisi və Azərbaycan xalçaçılığının tarixinə dair mühazirə ilə başlayacaqlar.
Ötən il ABŞ-ın qərb sahilində yaradılmış Kaliforniyanın Amerika-Azərbaycan Cəmiyyəti (KAAC) də 2007-ci ildə icma ilə Konqres arasında əlaqələri möhkəmləndirmək üçün siyasi fəallığını artırmaq niyyətindədir. Cəmiyyət həmçinin 2006-cı ildə təşkil etdiyi ABŞ-Azərbaycan İlk Gənclər Forumunun uğurunu və onun Amerikadakı icmamızın gənc nəsli arasında doğurduğu böyük marağı nəzərə alaraq, forumu illik toplantıya çevirmək qərarına gəlmişdir.
Bölmənin digər xəbərləri
