Ağcabədidə “Qadınların məşğulluq imkanlarının genişləndirilməsinə dəstək” adlı layihəyə yekun vurulub
Ağcabədi, 18 yanvar, AZƏRTAC
Ağcabədi rayonunda qadınların məşğulluğunun artırılması, sahibkarlıq istiqamətində təmsilçiliyinin və cəmiyyətdəki nüfuzunun yüksəldilməsi məqsədilə həyata keçirilən “Qadınların məşğulluq imkanlarının genişləndirilməsinə dəstək” adlı layihəyə yekun vurulub.
AZƏRTAC-ın bölgə müxbiri xəbər verir ki, bununla bağlı keçirilən tədbirdə Gənclər üçün Təhsil Mərkəzinin (GTM) Qarabağ ofisinin sosial işçisi Elnur Qasımov təqdimatla çıxış edərək, üçaylıq layihə çərçivəsində görülən işlər haqqında məlumat verib. Bildirib ki, layihənin məqsədi həssas əhali qrupundan olan qadınların məşğulluğuna dəstək göstərmək, həmçinin onların kiçik sahibkar kimi formalaşmalarına, bilik, bacarıqlarının artırılmasına, müvafiq peşəyə yiyələnmələrinə təkan verməkdir. On doqquz qadının cəlb edildiyi layihə çərçivəsində onlar üçün öz bizneslərini qurmaq və sahibkarlıq fəaliyyətini formalaşdırmaq istiqamətində bilik və bacarıqlarının artırılması üzrə təlimlər, müxtəlif peşə kursları təşkil olunub. Peşəkar mütəxəssislər tərəfindən müdavimlərə nəzəri biliklərlə yanaşı, istehsalat təcrübəsi zamanı praktiki bilik və bacarıqlar da tədris edilib.
GTM-in Qarabağ ofisinin rəhbəri Radə Telmanqızı dövlətimiz tərəfindən qadınların məşğulluğunun təmin edilməsi, müvafiq peşəyə yiyələnməsi üçün bir sıra tədbirlərin həyata keçirildiyini diqqətə çatdırıb. Bildirib ki, qadının ailədə, cəmiyyətdə layiqli yer tutması dövlətimizin əsas məqsədlərindən biridir. Bu layihənin məqsədi də dövlətin qadın siyasətinə dəstək xarakteri daşıyır.
Güvən Xeyriyyə İctimai birliyinin sədri Nigar Bayramlı layihənin bölgə qadınları üçün əhəmiyyətini vurğulayıb, bundan sonra da onlar üçün sosial əhəmiyyətli layihələrin icrasına dəstək olacaqlarını bildirib.
Digər çıxış edənlər qadınların əmək bazarında iştirak və məşğulluq imkanlarının artırılması istiqamətində layihənin əhəmiyyətini yüksək qiymətləndiriblər.
Sonra uşaqlar dərzilik kursunun iştirakçıları tərəfindən yaradılmış xüsusi kolleksiyada podiuma çıxıblar. Kolleksiya “İnklüziv Təhsil və Uşaq İnkişaf Mərkəzi”nin xidmətlərindən bəhrələnən uşaqlar tərəfindən nümayiş etdirilib.
Yekunda kursu müvəffəqiyyətlə bitirən şəxslərə sertifikat və iştirak etdikləri peşə kursuna uyğun avadanlıqlar verilib.
Bölmənin digər xəbərləri
