SİYASƏT
Ayova ştatının “Press Citizen” qəzeti “Qara Yanvar” haqqında məktub-müraciət dərc etmişdir
Vaşinqton, 17 yanvar (AZƏRTAC). Ayova ştatının “Press Citizen” qəzetində bu ştatda yaşayan azərbaycanlı Aqşin Tağıyevin “Qara Yanvar”la bağlı məktub-müraciəti dərc edilmişdir. Azərbaycan-Amerika Şurası (AAŞ) və Amerika Azərbaycan Cəmiyyəti (AAC) tərəfindən təşkil olunmuş kampaniya iştirakçısının yazılı müraciətində 1990-cı il yanvarın 19-20-də sovet qoşunlarının Bakıya soxulmasının və dinc əhalinin kütləvi qırğınının təfsilatı verilir. Məktubda deyilir: “Sovet ordusunun nizami qoşunlarının və xüsusi təyinatlı bölmələrinin iyirmi altı min nəfərlik kontingentinin Azərbaycan SSR vətəndaşlarına tutduğu divan Qorbaçovun aşkarlıq dövründə dinc əhaliyə qarşı zor işlədilməsinin amansızlığına görə misli görünməmiş nümunəsi olmuşdur”. Azərbaycanlı mühacirin qəzetin oxucularına müraciətində sovet ordusunun Human Rights Watch hüquq müdafiə təşkilatının Haaqa konvensiyası ilə qadağan olunmuş qarışıq ağırlıq mərkəzli güllələrdən istifadə etməsini pisləyən hesabatından sitatlar gətirilir. Azərbaycan xalqı onun müstəqilliyi uğrunda mübarizəyə təkan vurmuş 20 yanvar hadisələrinin qurbanlarını dərin hüznlə yad edir.
Yusif Babanlı
Vaşinqton