SİYASƏT
Azərbaycan diasporunun nümayəndələri Murmanskda görüşlər keçirmişlər
Moskva, 29 yanvar (AZƏRTAC). Ümumrusiya Azərbaycan Konqresinin (ÜAK) mərkəzi aparatının nümayəndə heyəti Murmansk vilayətində səfərdə olmuşdur.
Səfər çərçivəsində nümayəndə heyəti Murmansk şəhərinin meri Aleksey Vellerlə görüşmüşdür. A.Veller bildirmişdir ki, Murmanskda yaşayan azərbaycanlılar vilayət iqtisadiyyatının bir çox sahələrində uğurla çalışırlar. Bildirilmişdir ki, Azərbaycan diasporunun fəaliyyəti, yerli idarəçilik və icra orqanları ilə sıx münasibətləri vilayətdə digər diaspor təşkilatları üçün nümunədir. Murmansk şəhərinin meri Azərbaycan şəhərlərindən biri ilə qardaşlıq münasibətlərinin qurulması təklifini də irəli sürmüşdür. ÜAK nümayəndə heyəti şəhər administrasiyasına Azərbaycan haqqında kitablar və suvenirlər təqdim etmişdir.
ÜAK nümayəndə heyətinin səfəri Murmanskda keçirilən ənənəvi Milli Mədəniyyətlər Festivalına təsadüf etmişdir. Festivalda Murmanskda yaşayan müxtəlif millətlərin nümayəndələri iştirak edirlər. Murmansk Mədəniyyət sarayında təşkil edilən tədbirdə 20-dən çox diaspor təşkilatı təmsil olunmuşdur. ÜAK-ın Murmansk nümayəndəliyi sarayın foyesində ölkəmiz haqqında stend qurmuşdur. Azərbaycanın milli rəqsləri və mahnıları maraqla qarşılanmışdır. Soydaşlarımıza maraqlı çıxışlarına görə Murmansk administrasiyasının diplomları təqdim edilmişdir.
Regiona iki gün davam edən səfər çərçivəsində ÜAK-ın təşkilatçılığı ilə “Birinci millətlərarası Murmansk forumu” keçirilmişdir. ÜAK-ın Moskva regional bölməsinin sədri İlqar Hacıyev, konqresin Murmansk bölməsinin rəhbəri Afil Hüseynov Rusiyada fəaliyyət göstərən Azərbaycan diasporunun gördüyü işlərdən, planlardan söhbət açmışlar. Şəhər rəhbərliyinin nümayəndələri, Murmansk vilayətinin sosial yardım komitəsi sədrinin müavini Mixail Şilov, Murmansk vilayəti İctimai Palatasının üzvü Svetlana Praşkova və başqaları bu cür forumların vilayətin inkişafına təkan verdiyini və Azərbaycan diasporunun aparıcı rolunu vurğulamışlar. Forumda vilayətdə “Millətlər evi”nin və “Dostluq xiyabanı”nın yaradılması təklifləri irəli sürülmüşdür.
Fəridə Abdullayeva
AZƏRTAC-ın xüsusi müxbiri
Moskva