Azərbaycan dilində şeirlər ulyanovsklıların ürəklərini fəth edir
Bakı, 17 fevral (AZƏRTAC). Ulyanovsk şəhərinin kütləvi informasiya vasitələrində Ümumrusiya Azərbaycanlıları Konqresinin yerli bölməsinin fəaliyyəti haqqında məqalə dərc olunmuşdur. AZƏRTAC həmin məqaləni oxuculara təqdim edir.
X X X
78 nömrəli orta məktəb Ulyanovskda yaşayan azərbaycanlılara ona görə əzizdir ki, bu məktəbdə Milli tarix və mədəniyyət muzeyi yerləşir. Əvvəlcə burada Volqaboyu zonada yaşayan xalqların tarix və mədəniyyət muzeyi yaradılmışdı. Muzeydə rus, çuvaş, tatar, mordva və digər xalqların məişət əşyaları nümayiş etdirilirdi. 2008-ci ildə məktəbin rəhbərliyinin ÜAK-ın Ulyanovsk bölməsi ilə sıx əməkdaşlığı sayəsində Azərbaycan tarixi və mədəniyyəti muzeyi yaradıldı. Hazırda Ulyanovsk şəhərinə gələn tanınmış qonaqlar məmnuniyyətlə buraya baş çəkirlər. Yeri gəlmişkən qeyd edək ki, Heydər Əliyev Fondunun sayəsində 2010-cu ildə bina əsaslı təmir edilmişdir: muzey və məktəb sözün əsl mənasında simasını dəyişmişdir.
Burada hər həftə istirahət günlərində bazar günü məktəbi işləyir, azərbaycanlı uşaqlar üçün dərslər keçilir. Ötən bazar günü ana dilində ən yaxşı şeir ifası üçün keçirilmiş müsabiqəyə yekun vurmaq məqsədilə Ümumrusiya Azərbaycanlıları Konqresi Ulyanovsk bölməsinin sədri İslam Hüseynov başda olmaqla bölmənin nümayəndələri uşaqlara baş çəkmişlər. Tədbir Azərbaycanın və bütün şərqin görkəmli mütəfəkkiri, filosofu və şairi İmadəddin Nəsiminin anadan olmasının 645 illiyi ilə əlaqədar olaraq keçirilmişdir.
Azərbaycan dili və ədəbiyyatı müəllimi Gülnarə Mustafayevanın sözlərinə görə, uşaqlar dərslərə böyük həvəslə gəlir, müsabiqələrdə iştirak edirlər. müəllimə demişdir:
-Tədris “Ana dili - yeni dünya” proqramı üzrə keçirilir. Uşaqlar öz xalqının tarixini, dilini, məişətini və ənənələrini öyrənir, xalq mədəniyyəti ilə tanış olurlar.
Qeyd edək ki, dərslərə uşaqlarla birlikdə valideynlər də gəlirlər. Hər dəfə nə isə yeni bir şey öyrənmək onlar üçün də maraqlıdır.
Bir yaş fərqləri olan Zeynəb və Jalə Cəfərova bacıları istirahət günü məktəbində çoxdan məşğul olurlar. Burada keçirilən dərslər sayəsində qızlar Azərbaycan əlifbası ilə tanış olmuş, ana dilində sözlərin necə yazıldığını, nəhayət, azərbaycanca oxumağı öyrənmişlər. Onlar deyirlər:
-Bu, evdə valideynlərimizlə və azərbaycanlı rəfiqələrimizlə danışığımıza kömək edir.
Onlarla yanaşı bazar günü məktəbinə Cəfərovların kiçik bacısı, dörd yaşlı Nərgiz də gəlir. O da artıq ana dilində sözlər deməyə çalışır.
Beşinci sinif şagirdi, 25 nömrəli orta məktəbin şagirdi Şamil Novruzov isə bazar günü məktəbinə gələnədək Azərbaycanca bir az başa düşür və danışırdı. Lakin məhz burada o, təkcə öz vətəninin tarixi ilə deyil, həm də başqa xalqlara aid maraqlı faktlarla tanış olmuşdur, məsələn, müxtəlif ölkələrin bayraqlarındakı rənglərin mənasını öyrənmişdir.
Şamil deyir:
-Burada məşğul olmaq çox maraqlıdır, müsabiqəyə isə nəzakətli sözlər haqqında şeir hazırlamışam. Bu, mənim dinləyicilər qarşısında ilk çıxışım olmasa da, bir qədər həyəcanlanıram.
İslam Hüseynov ana dilini, Azərbaycan mədəniyyətini və milli ənənələrini öyrənmək istədiklərinə görə məktəblilərə səmimi minnətdarlığını bildirmiş və qeyd etmişdir ki, bu gün Ulyanovsk vilayətində təqribən 30 min azərbaycanlı vardır. O demişdir: “Biz regionun fəaliyyətinin bütün sahələrində fəal iştirak edirik. Ulyanovsk biz, azərbaycanlılar üçün ikinci vətən olmuşdur. Lakin ilk vətənimizi də unutmamalıyıq: buna görə də milli irsimizi əziz tutur və öyrənirik”.
Ulyanovskda məktəb və muzeydən əlavə, “Bahar” Azərbaycan rəqs ansamblı, “Bir dəfə Qafqazda” ŞHK komandası, “Neftçi-ÜAK” futbol komandası yaradılmışdır. Bundan başqa, ÜAK-ın Ulyanovsk bölməsi sağlam millətlərarası münasibətlərin yaradılmasına və Ulyanovsk torpağında yaşayan gənclərin dəstəklənməsinə yönəldilmiş bir çox mədəni, idman və xeyriyyə tədbirləri keçirir.
İ.Hüseynov demişdir: “Mən istəyirəm ki, Ulyanovsk torpağında toplanmış iş təcrübəsi bütün regionlara yayılsın” - bu sözləri Dmitri Medvedev regionumuza səfəri zamanı demişdir. Bu, bizim üçün ən yaxşı mükafatdır. Heydər Əliyev Fonduna və onun bizə daim kömək göstərən prezidenti Mehriban xanım Əliyevaya minnətdarlığımı bildirmək istəyirəm. Azərbaycanın Rusiya Federasiyasındakı səfiri, ÜAK-ın Moskvadakı rəhbərliyi, habelə Sergey Morozov başda olmaqla Ulyanovsk vilayətinin rəhbərliyi bizi dəstəkləyir, onlara böyük təşəkkür edirəm”.
78 nömrəli orta məktəbin direktoru Gennadi Tsaryov qeyd etmişdir ki, Ulyanovsk vilayəti çoxmillətli regiondur. Hazırda məktəbdə 12 millətdən olan uşaqlar təhsil alırlar. Muzey əsasında böyük tərbiyə işi aparılır. Belə ki, iki il əvvəl burada Ulyanovsk şəhərinin ali məktəblərində təhsil alan azərbaycanlı tələbələrlə “Mavi işıq” yeni il şənliyi təşkil edilmişdi. Bu yaxınlarda muzeydə 6-cı sinif şagirdləri üçün Nəriman Nərimanovun həyat və fəaliyyətinə həsr olunmuş dərs keçirilmişdir. Bundan əvvəl Müslüm Maqomayevə həsr olunmuş gözəl tədbir təşkil edilmişdi. Lap bu yaxınlarda muzeyə Çuvaşiyadan nümayəndə heyəti gəlmişdi. Burada uşaqları “MİR” uşaq təşkilatına qəbul edirdilər.
G.Tsaryov demişdir:
-Bu gün çox əhəmiyyətli və maraqlı tədbirdir, burada iştirak etmək mənə çox xoşdur. Düşünürəm ki, dostluğumuz bundan sonra da möhkəmlənəcəkdir.
İştirakçıların alqış sədaları altında uşaqlar məmnuniyyətlə ana dilində vətən və onun ənənələri haqqında, xalqlar arasında qarşılıqlı anlaşma haqqında şeirlər söyləmişlər. Məsələn, birinci sinif şagirdi Nemina Qasımova dostluq haqqında şeiri ilə hamının qəlbini fəth etmişdir, Cəfərova bacıları isə öz sevimli nənələri haqqında şeir ifa etmişlər.
Diasporun bəzi üzvləri sevdikləri əsərləri balacaların ifasında eşitdikdə yerlərində otura bilməyib özləri uşaqların qarşısında çıxış etmişlər. Sonda hər bir iştirakçıya hədiyyə verilmişdir.
Bölmənin digər xəbərləri
