Azərbaycan mədəniyyəti Murmanskda dostluq festivalında nümayiş etdirilmişdir
Bakı, 31 yanvar (AZƏRTAC). Murmanskda milli mədəniyyətlərin “Dostluq festivalı” adlı illik vilayət bayramı keçirilmişdir.
Rusiyanın Zapolyarye paytaxtında ənənəvi “Dostluq festivalı” artıq yeddinci dəfədir ki, keçirilir. Bu festival müxtəlif millətlərdən olan insanları sıx birləşdirmək məqsədi daşıyır. Yeddinci dəfə murmansklılar vilayət ərazisində yaşayan xalqların ənənələri ilə tanış olmaq imkanı əldə etmişlər. Hər il bayramda daha çox adam iştirak edir. Festival öz məqsədinə çatmışdır.
Ənənə üzrə “Dostluq festivalı” milli məişət əşyaları və müxtəlif mədəniyyətləri təmsil edən dekorativ-tətbiqi yaradıcılıq məmulatları sərgisi ilə başlanmış, Murmansk vilayətində yaşayan xalqların nadir milli koloritini əks etdirən səhnələşdirilmiş rəngarəng konsertlə davam etmişdir.
Murmansk vilayət Mədəniyyət sarayının mütəxəssisləri tərəfindən hər il keçirilən “Dostluq festivalı” sayəsində murmansklılar vilayət ərazisində yaşayan xalqların milli ənənələri ilə daha yaxından tanış ola bilirlər.
Bayram yaradıcılıq kollektivlərinin çıxışları ilə davam etmişdir. Murmansk vilayət Mədəniyyət sarayının səhnəsində regionun milli mədəni muxtariyyətlərinin yaradıcılıq kollektivləri, o cümlədən Ümumrusiya Azərbaycanlıları Konqresinin (ÜAK) regional şöbəsi yanında “Şərq incisi” xalq musiqi ansamblı çıxış etmişdir. Həmvətənlərimiz festivala iki nömrə - solo və rəqs nömrələri təqdim etmişlər. Emiliya və Amaliya Həsənova bacıları “Azərbaycan” mahnısını ifa etmiş, “Şərq incisi” qrupu isə rəqs nümayiş etdirmişdir.
Bu gün vilayətin ərazisində müxtəlif xalqların 100-dən çox nümayəndəsi yaşayır. Bunlar azərbaycanlılar, ukraynalılar, beloruslar, litvalılar, tatarlar, gürcülər, özbəklər və başqa xalqların nümayəndələridir. Onların hər birinin öz mentalitetinə və mədəniyyətinə xas olan xüsusiyyətləri vardır. Ukrayna xor mahnısı, başqırd motivləri və çuvaş rəqsləri, Qafqaz xalqlarının musiqisi... Festivalda 22 xalqın mədəniyyəti və ənənələri nümayiş etdirilmişdir.
Şübhəsiz ki, festival gözlənilməz, parlaq yaradıcılıq ifaları və səmimi, şən, bayram əhval-ruhiyyəsi ilə Murmansk tamaşaçısını sevindirmişdir.
Festivalda ÜAK mərkəzi aparatının nümayəndələri - ÜAK Şimal-Qərb federal dairəsinin kuratoru Ülfət Əliyev və konqresin icra aparatının nümayəndəsi İlqar Hacıyev iştirak etmişlər.
Festivaldan sonra “Meridian” konqres-otelinin konfrans zalında 1-ci Murmansk Millətlərarası Forumu olmuşdur. ÜAK-ın Murmansk şöbəsi tərəfindən təşkil edilmiş forumun qonaqları bütün milli diasporların rəhbərləri, Murmansk Şəhər Administrasiyasının Sosial yardım, ictimai təşkilatlarla qarşılıqlı fəaliyyət və gənclərə dair işlər komitəsi sədrinin müavini Mixail Şilov, Murmansk vilayətinin İctimai təşkilatlarla qarşılıqlı fəaliyyət və gənclərə dair işlər komitəsinin məsləhətçisi Rimma Nikolayeva, Murmansk vilayəti ictimai palatasının üzvləri və ÜAK mərkəzi aparatının nümayəndələri olmuşlar.
ÜAK Murmansk şöbəsinin sədri Afil Hüseynov iştirakçıları salamlayaraq demişdir ki, forumda hamıya öz təklif və istəklərini bildirmək, iş təcrübəsini mübadilə etmək imkanı yaradılmışdır. Forumun iştirakçıları yekdilliklə belə qənaətə gəlmişlər ki, tədbir çox zəngin və maraqlı keçmişdir.
Bölmənin digər xəbərləri
