Azərbaycan Prezidentinin Almaniya səfəri geosiyasi əhəmiyyət daşıyır- RƏY
Bakı, 25 iyul, AZƏRTAC
Almaniya Avropa İttifaqı daxilində Azərbaycanın əsas iqtisadi-siyasi tərəfdaşlarından biridir. Azərbaycan isə Almaniya üçün Cənubi Qafqazda istinad edilməli olan ən sabit, etibarlı və perspektivli dövlətdir. Prezident İlham Əliyevin Berlinə son rəsmi səfəri çərçivəsində imzalanan "İkitərəfli tərəfdaşlığın Strateji Gündəliyinə dair Birgə Bəyannamə", eləcə də Azərbaycan-Almaniya Biznes Şurasının yaradılması barədə razılaşma iki ölkənin münasibətlərinin keyfiyyətcə yeni mərhələyə keçidini rəsmiləşdirdi.
Bu sözləri AZƏRTAC -a açıqlamasında Mətbuat Şurası İdarə Heyətinin üzvü, media eksperti Müşfiq Ələsgərli söyləyib.
O bildirib ki, beynəlxalq münasibətlər sistemində baş verən son geosiyasi dəyişikliklər Azərbaycan-Almaniya əməkdaşlığına da yeni məzmun qazandırıb. Rusiya-Ukrayna müharibəsinin başlanmasından sonra Avropanın enerji təhlükəsizliyi məsələsi Almaniyanın xarici siyasətinin prioritet istiqamətlərindən birinə çevrilib. Bu kontekstdə Azərbaycan Avropanın enerji təhlükəsizliyinin təmin edilməsində etibarlı tərəfdaş statusu qazanıb. Cənub Qaz Dəhlizi, TANAP və TAP layihələrinin Avropanın enerji xəritəsində strateji rolu güclənib. Almaniya bu reallığı nəzərə alaraq Azərbaycanla əməkdaşlığın daha da genişləndirilməsində maraqlı olduğunu nümayiş etdirir.
"İki ölkə arasında münasibətlərin perspektivi yalnız enerji layihələri ilə məhdudlaşmır. Dünyanın nəqliyyat və logistika marşrutlarının yenidən formalaşdığı indiki dövrdə Azərbaycan Orta dəhlizin əsas iştirakçılarından biri kimi Avropa üçün xüsusi əhəmiyyət qazanır. Çin-Mərkəzi Asiya-Azərbaycan-Türkiyə-Avropa xətti üzrə formalaşan bu marşrut Almaniyanın da iqtisadi maraqlarına cavab verir. Avropanın aparıcı sənaye ölkəsi olan Almaniya üçün yüklərin təhlükəsiz və alternativ marşrutlarla daşınması strateji əhəmiyyət daşıyır.
Prezident İlham Əliyevin Almaniya səfərinin ən mühüm nəticələrindən biri də münasibətlərin siyasi baxımdan yeni səviyyəyə yüksəlməsi oldu. “Strateji Gündəliyə dair Birgə Bəyannamə”nin imzalanması göstərdi ki, tərəflər artıq əməkdaşlığı ayrı-ayrı layihələr çərçivəsindən çıxararaq uzunmüddətli strateji tərəfdaşlıq modelinə keçirməyə qərarlıdırlar. Bu sənəd gələcək əməkdaşlığın əsas istiqamətlərini müəyyənləşdirən yol xəritəsi rolunu oynayır. O, enerji, ticarət, investisiya, sənaye, rəqəmsal texnologiyalar, yaşıl enerji, elm, təhsil və humanitar əməkdaşlıq kimi sahələri əhatə edir",- deyə M. Ələsgərli vurğulayıb.
Ekspert əlavə edib ki, səfər çərçivəsində Almaniya Kansleri Fridrix Mertslə keçirilən görüş də xüsusi diqqət çəkdi. Görüş zamanı Almaniya rəhbərliyi Azərbaycanla əməkdaşlığın genişləndirilməsində maraqlı olduğunu açıq şəkildə ifadə etdi. Kansler Cənubi Qafqazda sülh prosesinin dəstəkləndiyini bildirib və Azərbaycan ilə Ermənistan arasında sülh sazişinin imzalanmasının regionun gələcək inkişafı üçün mühüm əhəmiyyət daşıdığını vurğulayıb. Bu yanaşma Almaniyanın Azərbaycanı yalnız enerji tərəfdaşı kimi deyil, həm də regional təhlükəsizlik və sabitliyin təmin edilməsində mühüm aktor kimi qəbul etdiyini göstərir.
Bölmənin digər xəbərləri
