Azərbaycan Turizm İnstitutu yeni bir beynəlxalq layihənin iştirakçısıdır
Bakı, 16 aprel (AZƏRTAC). Fəaliyyətə başladığı gündən beynəlxalq əməkdaşlığa xüsusi əhəmiyyət verən Azərbaycan Turizm İnstitutu (ATİ) bu sahədəki uğurlarını davam etdirməkdədir.
ATİ-nin mətbuat xidmətindən AZƏRTAC-a bildirmişlər ki, bu ali təhsil ocağı Avropa İttifaqının LMPH “Gürcüstan, Azərbaycan və Moldovada turizm sənayesinin inkişafı üçün mehmanxana işinin menecmenti üzrə bakalavr-magistr hazırlığı” 544191 Tempus 1-2013 -1-PT JPCR” layihəsində iştirakçı hüququ qazanmışdır.
Layihənin əsas məqsədi iştirakçı ali məktəblərin tədris planlarının Tvinninq metodologiyasına uyğun hazırlanması, həmin tədris planlarının Avropa universitetləri ilə eyniləşdirilməsi, ikili diplomların və diploma əlavələrin verilməsini nəzərdə tutur.
Layihə çərçivəsində aprelin 7-dən 11-dək Fransanın Tonon-le-Ben şəhərində keçirilən ilk beynəlxalq seminarda ATİ-ni turizm biznesi kafedrasının müdiri, dosent Bahadur Bilalov təmsil etmişdir. O, seminarın ilk günündə toplantı iştirakçılarını ATİ-nin fəaliyyəti ilə tanış etmiş, turizm və otelçilik ixtisası üzrə institutda həyata keçirilən bakalavr və magistr hazırlığından danışmış və müvafiq tədris planını diqqətə çatdırmışdır. Layihənin ümumi əlaqələndiricisi Fransadakı Qrenobl Akademiyasının professoru Jean-Noel Pachoud ATİ-nin böyük gələcəyi olduğuna əminliyini ifadə etmişdir.
Beynəlxalq tədbirin sonuncu günündə layihənin ölkələr üzrə idarə heyəti təsdiq edilmişdir. Azərbaycan Texniki Universitetinin professoru Həsən Hüseynov Azərbaycan üzrə milli əlaqələndirici, dosent Bahadur Bilalov onun müavini seçilmişdir.
Bölmənin digər xəbərləri
