Azərbaycanın diaspor təşkilatları Türkiyə xalqının kədərinə şərikdir
Bakı, 16 may (AZƏRTAC). Mayın 14-də Türkiyənin Manisa vilayətinin Soma kömür mədənində baş vermiş qəza nəticəsində çoxsaylı insan tələfatı ilə nəticələnən faciə ilə əlaqədar Azərbaycanın diaspor təşkilatlarının nümayəndələri fəaliyyət göstərdikləri ölkələrdə Türkiyənin diplomatik nümayəndəliklərinə başsağlığı məktubu ünvanlamışlar.
Diasporla İş üzrə Dövlət Komitəsindən AZƏRTAC-a bildirilmişdir ki, Nyu-York Amerika Azərbaycan Qadınlar Assosiasiyası hadisə ilə əlaqədar Türkiyənin BMT-dəki nümayəndəliyinə və ABŞ-dakı səfirliyinə məktub ünvanlayaraq Türkiyə dövlətinə dərin hüznlə başsağlığı vermişdir.
Texas Azərbaycan Cəmiyyəti yüzlərlə insanın həlak olması ilə əlaqədar Hyuston Türk Assosiasiyasına başsağlığı məktubu ünvanlamışdır.
Avropa Azərbaycanlıları Konqresi Soma şəhərində baş vermiş qəza nəticəsində yüzlərlə insanın həlak olması ilə əlaqədar Türkiyənin Almaniyadakı səfirinə, baş konsuluna, Kölndəki baş konsula, o cümlədən türk diaspor təşkilatlarının nümayəndələrinə başsağlığı məktubu göndərmişlər.
Bundan başqa, “Alm.az Drezden” Cəmiyyəti və Bielefeld NRW-Alman-Azərbaycan Mədəniyyət Cəmiyyəti də Türkiyənin Almaniyadakı səfirliyinə başsağlığı məktubu ünvanlamışlar.
Almaniya Azərbaycan Mədəni Əlaqələr Mərkəzi Türkiyənin Almaniyadakı səfirinə göndərdiyi məktubda bildirmişdir ki, bu faciəvi hadisə qardaş Azərbaycan xalqını, Almaniyadakı Azərbaycan diasporunu da dərindən kədərləndirmişdir. “Bu gün biz - Avropada və Almaniyada yaşayan azərbaycanlılar türk qardaşlarımızın yanındayıq və bu kədəri ürəkdən bölüşürük”,- deyə məktubda qeyd olunmuşdur.
Ümumrusiya Azərbaycan Konqresinin icraçı direktoru İlqar Hacıyev baş vermiş qəza ilə əlaqədar Türkiyə KİV-lərinə müsahibəsində demişdir: “Biz qardaş Türkiyə xalqının ağrı və kədərini bölüşürük. Rusiyadakı Azərbaycan diasporu adından Türkiyə xalqına və faciəvi hadisə zamanı yaxınlarını və əzizlərini itirənlərə dərin hüznlə başsağlığı verir və yaralılara tezliklə Allahdan şəfa diləyirik”.
Bölmənin digər xəbərləri
