Azərbaycanlı rejissor “Senej” Prezident İdarəetmə Emalatxanasının eksperti seçilib
Moskva, 20 dekabr, AZƏRTAC
Məşhur azərbaycanlı rejissor və müəllim Tərlan Rəsulov “Rusiya imkanlar ölkəsidir” Prezident platformasının tədris mərkəzi olan “Senej” İdarəetmə Emalatxanasının eksperti seçilib.
AZƏRTAC xəbər verir ki, “Rusiya-Komandalar vaxtıdır” forumunda T.Rəsulov teatr texnikası və komanda qurma texnikası üzrə iki orijinal ustad dərsi keçib. Azərbaycanda ilk və yeganə “dOM” interaktiv teatrın yaradıcısı tamaşaçılara “komanda” anlayışının supervəzifəsi, effektiv və ahəngdar birləşmələr yaratmağa kömək edən əsas alətlər haqqında danışıb, həmçinin iştirakçılara yaradıcılıq və improvizasiya bacarıqlarının stimullaşdırılmasına yönəlmiş bir sıra praktiki məşğələlər təklif edib. Bundan əlavə, o, “Həllər laboratoriyası” platformasında “Elm və mədəniyyətin görüşü” mövzusunda məruzəçi olub. Ekspert biliyin iki əlaqəli sahəsinin strateji inkişaf və sinerji konsepsiyaları ilə bağlı fikirlərini bölüşüb, dövrün yeni çağırışları qarşısında institutlararası əlaqələr və əməkdaşlıq haqqında müzakirələrin fəal iştirakçısı kimi çıxış edib.
“Senej” idarəetmə emalatxanası Rusiyada dövlət, biznes və cəmiyyət sahələri üçün menecerlərin hazırlanması üzrə əsas ocaqdır. Bu, yaxşıların ən yaxşısının platformasıdır və təbii ki, bu təhsil klasterinə dəvət mənim təcrübəmin və nailiyyətlərimin dəyərli etirafı olmaqla yanaşı, həm də yüksək şərəfdir”, - deyə T.Rəsulov AZƏRTAC-ın müxbirinə müsahibəsində bildirib.
O qeyd edib ki, “Senej” İdarəetmə Emalatxanasında səmərəli bilik və təcrübə mübadiləsi üçün hər şey nəzərdə tutulub. “Azərbaycanda toplanmış təcrübə və ideyaların Rusiyada dəstək və qəbul olunduğunu görmək məni çox sevindirdi. Forumun on iki bölməsi iki gün ərzində Rusiyanın hər yerindən və dünyanın 10 ölkəsindən, müxtəlif yaş və peşələrdən olan 700-dən çox iştirakçının diqqəti və düşüncəsi uğrunda savaşdı və mən çox şadam ki, mən, debütant, bu platformada tam anşlaq toplaya bildim”, - deyə o, təəssüratlarını bölüşdü.
Tərlan Rəsulov - teatr rejissoru, teatr məşqçisi, prodüserdir. Azərbaycanda ilk interaktiv “dOM” teatrının yaradıcısıdır. Spontan aktyor oyunu metodunun müəllifi, “Mədəniyyət ərazisi” yaradıcılıq layihələrinin rejissoru və müəllifidir. O, “EU4Cultire” Avropa platformasının milli eksperti, Azərbaycan Mədəniyyət Nazirliyi yanında Ekspert Şurasının üzvü, Azərbaycan Teatr Xadimləri İttifaqı yanında eksperimental teatr laboratoriyasının müdiridir. UNİCEF, Birləşmiş Millətlər Təşkilatının Qaçqınlar üzrə Ali Komissarlıq İdarəsi, Höte İnstitutu, “British Council” və s. dəstəyi ilə yaradılmış sosial və teatr layihələrinin müəllifi və rejissorudur. Azərbaycan Teatr Xadimləri İttifaqının, “EURODRAM” Avropa Dram Tərcümə Şəbəkəsinin, Şərqi Avropa İfaçılıq Sənəti Platformasının üzvü, Beynəlxalq teatr festivallarının iştirakçısı və laureatı, beynəlxalq forum və konfranslarda ekspert və məruzəçidir. 2024-cü ildən Moskvada yaşayır və işləyir.
“Senej” idarəetmə emalatxanası 2019-cu ildə yaradılmış təhsil mərkəzidir, onun bazasında məmurlar və istedadlı gənclər: ictimai təşkilatların liderləri, ictimai fəallar, könüllülər, gənc peşəkarlar (hüquqşünaslar, iqtisadçılar, jurnalistlər, sosioloqlar, müəllimlər, alimlər) üçün təlim proqramları və tədbirlər keçirilir. “Senej” İdarəetmə Emalatxanasında “Rusiya – imkanlar ölkəsi” Prezident platformasının layihələrinin əyani mərhələləri - seminarlar, strateji sessiyalar, forumlar və konfranslar keçirilir.
AZƏRTAC-ın xüsusi müxbiri
Moskva
Bölmənin digər xəbərləri
