BERLİNDƏ ALMANİYA AZƏRBAYCANLILARININ ƏLAQƏLƏNDİRMƏ MƏRKƏZİNİN İCLASI OLMUŞDUR
AZƏRTAC-ın xüsusi müxbiri xəbər verir ki, dekabrın 13-də Azərbaycanın AFR-dəki səfirliyində Almaniya Azərbaycanlılarının Əlaqələndirmə Mərkəzinin iclası olmuşdur. Tədbirdə Əlaqələndirmə Mərkəzinin şura üzvləri, Azərbaycanın Almaniyadakı diaspor təşkilatlarının nümayəndələri və Azərbaycan səfirliyinin əməkdaşları iştirak etmişlər.
İclası Azərbaycanın AFR-dəki səfiri Pərviz Şahbazov açmış və yaxın keçmişdə Avropa İttifaqının aparıcı ölkəsində Azərbaycan diasporunu cəm halda formalaşdıran çoxsaylı diaspor təşkilatlarının, mədəniyyət mərkəzləri və cəmiyyətlərin fəaliyyətini əlaqələndirən bir qurum yaradılması zərurətinin səbəbləri barədə danışmışdır. Belə bir qurum həm də diaspor təşkilatları üçün Almaniyada yaşayan həmvətənlərimizin qarşıdakı planları və nəzərdə tutulan tədbirlər barədə ən səmərəli və operativ formada məlumat verən informasiya mərkəzi olmalı idi. P.Şahbazob demişdir: “Bu yaxınlarda yaradılmış Almaniya Azərbaycanlılarının Əlaqələndirmə Mərkəzi öz qarşısına məhz bu vəzifəni qoymuşdur”. O, Mərkəzin üç əsas funksiyasını vurğulamışdır - Azərbaycanın Almaniyadakı diaspor təşkilatlarının fəaliyyətinin əlaqələndirilməsi, müxtəlif tədbirlərin təşkil edilməsi və Almaniyanın rəsmi strukturları - federal hökumət, parlament, yerli hakimiyyət orqanları ilə iş, habelə alman KİV ilə əlaqələlər. Səfir Almaniyanın dövlət strukturlarının paytaxtda yerləşməsini nəzərə alaraq Əlaqələndirmə Mərkəzinin iş yeri kimi paytaxtın müəyyən olunmasını təklif etmişdir.
Əlaqələndirmə Mərkəzinin icraçı direktoru Samirə Patser-İsmayılova Şuranın iclaslarının ildə 1-2 dəfə keçirilməsini təklif etmişdir. O, tədbirə toplaşanlara bildirmişdir ki, Mərkəz ölkənin müvafiq dövlət orqanlarında rəsmi qeydiyyata alınmış və bu təşkilatın nizamnaməsi təsdiq edilmişdir. Patser-İsmayılova xüsusi qeyd etmişdir ki, Əlaqələndirmə Mərkəzi təşkilatın fövqündə dayanan bir qurum deyil və onun məqsədi təşkilatın adında ifadə olunmuşdur - hər birinin öz tədbirlər proqramı olan müxtəlif diaspor təşkilatlarının fəaliyyətini əlaqələndirmək.
İclasda Əlaqələndirmə Mərkəzinin digər üzvləri də çıxış etmişlər. Almaniya KİV ilə əlaqələrin tənzimlənməsinin və genişlənməsinin, Azərbaycan təşkilatlarının fəaliyyətinin Almaniyanın media məkanında işıqlandırılmasının, Azərbaycan tarixinin və mədəniyyətinin Almaniya cəmiyyətində populyarlaşdırlmasının vacibliyi qeyd edilmişdir.
######
 |
 |
Bölmənin digər xəbərləri
